Namti Lam Braw Yang Hpung Magam Gun Sara Hkun Jaw Li Gyam Sat Hkrum: (KHRW)Kawn N Dau Laika Shapraw

Pajau Media Channel

18th March, 2024

Namti Lam Braw Yang mare KBC hpung magum gun Usa Sara Hkun Jaw Li hpe March (18) ya (2:00) PM grup yin daram hta kadai, gara uhpung na re n chye lu ai la marai (3) kajawng kaja cycle hte du wa nna sanat gap sat kau da ai mabyin hpe grai maroi n ni, myit yawn ai lam KHRW kawn mung n dau laika shapraw da ai re.

Kachin Human Rights Watch a n dau laika hta “Namti Lam braw Yang hpung magam gun Sara Hkun Jaw Li hpe mying nchye lu ai uhpung kawn sanat hte gyam sat ai. Sara Hkun Jaw Li gaw Namti ginra ramma ningbaw ningla shara hta tsap nna ramma ni a ahkaw ahkang ramma ni hta arang bang shakut shaja ai lam hta myit su myit rawt let shang lawm ai sara mung re hte ya na zawn sara gyam sat hkrum ai mabyin ntsa dum nta masha ni hte rau grai myit n pyaw myit yawn ai, kadai gara uhpung re mying nchye ai hpung ni kawn gyam sat ai mabyin hpe tsep kawp ninghkap nra sharawng ai lam” ndau laika shapraw da ai re.

Myi man magap da ai la marai (3) gaw sara nga ai dum nta de shang wa nna sanat hte 5 lang ram gap bun ai majaw asak si sum mat ai re lam, Sara Hkun Jaw Li gaw asak (45) ning daram re sai hte Ma (5) kawa mung re sha n-ga myu sha lam yan, ka-ni nanghpam PJS ai magam bungli ni hta mung myit su myit rawt let shang lawm daw jau nga ai sara langai mung re.

Myu sha lam yan hta ganing re ai aten hta raitim myit su myit rawt let shang woi awn galaw nga ai sara langai gyam sat hkrum ai ntsa sara hte hku hkau nga ai manaw manang ni, hpung masha ni hte ramma ni grai myit npyaw myit yawn hpa re sha n-ga amyu sha yawng a matu sum machyi lam re lam ganghkau Facebook laika man hta ka n dau nga ma ai re. Hpa majaw ya na zawn gyam sat wa ai ngu lawng lam hte kadai gara uhpung ni galaw ai ngu hpe gaw tup hkrak nchye lu ai.