Nbungli Bawm A Majaw Mung Masha Langai Bai Asak Si Sum

Pajau Media

September 19, 2025

KIA Masat (11) Dap dung ginra Kasung mare kaw Myen hpyen dap kawn September 18 ya shani hkying 10 aten daram hta Nbungli bawm wa gap jahkrat ai majaw Mung masha langai asak si sum ai lam chye lu ai.

Jet Fighter langai gaw Kasung mare Mung masha ni shanu nga ai ginra de bawm 2 lang wa hkrat ai hta amyu shayi langai asak si sum nna dum nta hten za ai lam nga ai hpe chye lu ai.

Asak si sum mat ai amyu shayi gaw Namti Lam Braw Yang mare Ja Chyai lawk kaw na asak (20) ning re ai shayi Roi Ja rai nna laknak hkra ai ningma sawng ai majaw Myitkyina tsi rung de wa sa ai lam kaw asak si sum mat ai lam chye lu ai.

Dai zawn sha Hpakant ginra hta mung September 17 ya shani lani laman hta sha Mung masha marai (4) Asak si sum nna marai (6) hkala sawng ai lam chye lu ai.

Gasat gala majan byin ai lam n nga ai ginra hkan Myen hpyen dap Nbungli bawm wa jahkrat ai lam jahkring hkring galaw nga ai zawn laknak kaba gap shadam ai lam ni a majaw mara kata Mung masha hkala, asak si sum ai lam law law nga wa ai re hpe mung chye lu ai.

Shiga – Htu Seng