Nbungli Bawm, Drone Ni Gap Shadam Nga Ai Majaw Shimlam Sadi Maja Na Matu KIA Ndau Ai Lam

Pajau Media

Sep 4. 2025

Myen hpyen dap gaw gasat gala n byin ai shara hkan nbungli bawm, laknak kaba hkrup mara gap shadam ai majaw Mung masha ni shimlum lam grai sadi maja na matu KIA kaw nna sadi jaw da ai lam chye lu ai.

Myen hpyen dap gaw Jinghpaw Mung Waimaw, Manmaw ginra ni hta tat sum kau sai shara ni hpe bai lu la hkra nbungli hpe madung jai lang htim gasat ai majaw ya aten gasat gala majan laja taw ai re.

Dai sha n-ga Hpakant ginra de mung gasat gala majan jahkring hkring byin ai hta laknak kaba, nbungli, drone ni hkrup mara gap shadam ai majaw Mung masha si hkala hkrum ai lam jahkring hkring nga ai re hpe chye lu ai.

Myen hpyen dap gaw Jinghpaw Mung sha n-ga myen mungdan ting hta majan byin taw nga ai ginra ni hta sha n-ga gasat gala n nga ai shara hkan mung nbungli bawm gap jahkrat ai lam matut manoi galaw nga dingyang re hpe chye lu ai.

Shiga - Hpring