Nbungli Bawm Hkrup Mara Gap Bun Ai Hta Shata Mi Laman Mung Masha 270 Hkawt Asak Si Sum Ai Lam NUG Kawn Ndau

Pajau Media

May 5,2025

April shata laman hta Myen hpyen dap gaw Rawt Malan Hpung ni nga ai ginra de hpyen n-gun jat laja lana htu shadut nga ai sha n-ga nbungli bawm hkrup mara gap bun ai hta shata mi laman Mung masha 270 hkawt asak si sum ai lam NUG kawn May 5 ya shani n dau da ai hpe chye lu ai.

Myen mungdan kata April shata laman gaw Nnang Nawn tsin yam a majaw hkye mawoi bungli ni, gaw gap ai lam ni hpe madung tawn galaw ra ai raitim tsin yam hkrum ai aten laman Myen mungdan kata gasat gala majan grau sawng wa ai re hpe chye lu ai.

March 28 ya kaw nna May 4 ya du hkra Myen mungdan ting hta nbungli hte dingsa gasat ai lam (282) lang galaw nna marai (276 ) gaw asak si sum nna marai (456) gaw hkala hkrum ai lam ndau da ai re.

Si sum ai kaw asak (18) ning n pu asak n hpring shi ai ma ni marai 31 lawm nna hkala hkrum ai kaw 45 lawm ai lam tang madun da ai. Nbungli bawm wa jahkrat ai law dik gaw Sagaing ginra rai nna asak si sum ai masha marai (89), hkala hkrum ai (135) nga ai lam tsun da ai re.

 Numbat lahkawng law dik gaw Mandalay ginwang hta gaw nbungli bawm (61) lang wa jahkrat ai hta Masha marai (65) asak si sum nna marai (118) hkala ai re. Numbat masum law dik gaw Magwi ginwang rai nna shata mi laman nbungli bawm (29) lang wa ja hkrat ai hta asak si sum ai marai (12) hte hkala ai marai (29) nga ai lam tang madun da ai re.

Myen hpyen dap gaw Nnang Nawn tsin yam hkrum sha ai aten Mungdan gaw sharawt bungli ni, hkye mawoi bungli ni madung galaw ra ai raitim Jinghpaw mung sha n-ga Rawt Malan Hpung ni nga ai ginra de shani shagu nbungli, drone ni hte laja lana gap gasat nga ai rai nna hpyen n-gun jat ai lam dingyang galaw nga ai majaw gasat gala majan laja nga ai sha n-ga mara kata mung masha tsa kaba asak si sum nga sai re hpe chye lu ai.

Shiga- Pyilan U