Nbungli Bawm Jahkrat Ai Lam Jahkring Hkring Galaw Ai majaw Grai Sadi Maja Ra Ai Lam

Pajau Media

September 3.2025

Jinghpaw Mung Manmaw hte Waimaw Ginra ni de myen hpyen dap gaw htu shadut htim gasat ai hta nbungli bawm jahkrat ai lam mung laja lana galaw ai majaw Mung masha ni nbungli hpyen grai sadi maja ra sai lam Mung masa maram nga ai ni tsun ai re.

Waimaw Ginra Lamyang makau grup yin de September 2 ya shani hkying 9 kaw na hkying 11 lapran hta nbungli bawm (3)lang jahkrat bun ai lam chye lu ai. Dai shani summwi ni ka-up nga ai aten re majaw nbungli sa wa ai n mu lu ai hte n sen sha na ai majaw hpabaw nbungli hpan re ngu hpe gaw n chye lu ai re.

KIA maga na gaw Waimaw Lamyang, Mukchyik, Washawng mare hkan na naw ngam nga ai Mung masha ni mung lawan yen na matu tsun ai lam KIA hte ni nawn ai masha ni tsun ai.

" Waimaw mayan hkan naw ngam nga ai Mung masha ni yawng hpe yen na matu tsun da ai da, mani gaw hkying 12 aten daram hta Ga Ra Yang maga de mung n bungli hpyen gawai ai lam nga ai, mana n sin kaw Mung Drone ni bai pyen ai, N bungli gaw sadi maja Ra ai" nga nna Tsun ai.

Ya aten Waimaw Ginra gasat gala majan laja nga dingyang re. Myen hpyen dap gaw lagaw lam sha n-ga nbungli hpe mung madung jai lang na gasat ai re majaw Mung masha ni nbungli bawm grai sadi maja ra sai re.

August 31 ya shani hta mung nbungli bawm jahkrat ai majaw asak 7 ning re ai Shayi Shesoi Hkawng Naw asak si sum ai hte marai 4 hkala hkrum ai lam nga sai re. Waimaw Lamyang ginra de myen hpyen dap gaw August htum wa maga kaw nna n-gun kaba hte htu shadut htim gasat wa ai re hpe mung chye lu ai.

Shiga - Pyilan U