Nbungli, Drone Bawm Htim Gasat Ai Lam Laja Ai Majaw Manmaw Ginra Na Dap Shara N Kau KIA Yen Kau Da Ra Ai Lam

Pajau Media

September 13, 2025

Manmaw ginra tat sum ai lam n nga hkra myen hpyen dap gaw lagaw lam sha n-ga nbungli hku nna mung laja lana htim gasat nga ai majaw KIA pawng hpawm hpung ni kawn lu la da sai dap shara n kau hpe gan yen kau da ra ai hpe chye lu ai.

KIA pawng hpawm hpung ni zing madu la da ai Hprigang Dap 5014, Hk. L.Y 236 Dap lahkawng hpe nbungli drone bawm ni hte laja lana gap sharu bun ai sha n-ga lagaw lam hku nna mung htu shadut htim gasat ai majaw September 11ya shani hta gan yen kau da ra ai lam chye lu ai.

Manmaw ginra de lai wa sai August praw laman myen hpyen dap sanghpaw hpung ni du shang wa ai hpang hpyen laknak arung arai ni wa jahting ai hpang kaw majan laja ai gaw ya aten du hkra re.

 Manmaw zing madu majan hta lahkawng maga si hkala sum machyi ai lam law ai hte Manmaw zing majan gaw n dai shata hta shata (9) hpring sai re.

Ya na zawn bai lu da ai shara ni hpe yen kau da ra ai gaw myen hpyen a htu shadut htim gasat majan hta nbungli, drone sha n-ga madang tsaw hpyen gasat laknak jak rai madung jai lang htim gasat ai majaw re nga nna Mung masa maram nga ai salang ni tsun nga ma ai re.

Manmaw ginra hta ya aten shani shagu gasat gala majan laja nga ai re hte KIA pawng hpawm hpung ni mung Manmaw ginra zing madu majan hta n-gun dat shakut nga ding yang re lam chye lu ai.

Shiga - Pyilan U