Nbungli Hpyen Hkrit Tsang Ra Ai Majaw Pat Da Ai Shanglawt Jawng Ni Bai Hpaw Sai Lam

Pajau Media

October 14, 2025

Myen hpyen dap gaw Shanglawt Asuya Uphkang Ginra tai nga sai ginra hkan Nbungli bawm hkrup mara jahkrat ai lam ni galaw ai majaw gan pat da ai Shanglawt Asuya Jawng ni bai hpaw sharin nga sai lam chye lu ai.

" Moi ya Sadung kaw Nbungli wa gap ai hpang kaw nna Ga Ra Yang, Katsu, Dabak hkan na Shanglawt Asuya Jawng ni hpe gan pat da ai re. Mani kaw na gaw bai hpaw sai. Tsang gaw tsang ra tim ma ni a hpaji lam re majaw hpaw ai ga rai nga " nga nna Dabak Mare masha langai tsun ai.

Hpyen koi yen Mung masha ni bai wa nga ai hpang Dabak mare kaw mung Shanglawt Asuya Jawng Tsang 7 du hkra hpaw sharin taw sai re hte Ga Ra Yang kaw mung Tsang 10 du hkra hpaw sharin nga ai rai nna October 13 kawn bai hpaw sharin nga sai lam chye lu ai.

Myen hpyen dap gaw Rawt malan hpung ni zing madu da sai ginra hkan Ga lam hku htu shadut ai lam n nga tim Nbungli bawm kajawng kaja wa jahkrat ai sha n-ga law malawng gaw Hpaji Jawng, Nawku Jawng zawn re ai masha law law hpawng chyawm mai ai shara hkan sha Nbungli bawm wa jahkrat bun nga ai re.

N dai laman Myitkyina Laiza sa lam, Nang Zaw Yang hkrun lam makau Waimaw Lamyang ginra hta mung shani shagu ngu na Nbungli bawm wa jahkrat ai re hte lai wa lai sa hkrun lam hkawm masha ni mung majan lapran yak yak hkak hkak rai hkawm sa taw ra ai lam hkrun lam hkawm masha ni tsun ai kaw na chye lu ai.

Shiga - Pyilan U