Nbungli Lakmat Manu Ladu Lai Tsaw Rawt Wa Ai Majaw Hkrun Lam Hkawm Mung Masha Ni Yak Hkak Ai Lam

Pajau Media

September 19, 2025

Myitkyina-Yangon, Myitkyina-Mandalay nbungli hkrun lam manu ni ladu lai rawt nga ai majaw hkrun lam hkawm Mung masha ni grai yak hkak nga ai lam chye lu ai.

"Hpaji lam hte Yangon de yu ra ai wa nbungli lakmat grai manu hpu ai, sen 9 pyi du wa ai, lakmat nau hpu na n lu mari ai, masa kade n pyaw tim mawdaw hte sha sa na matu galaw da sai, mawdaw hkrun lam manu gaw Myitkyina-Yangon sen 3 jan yang du sai " nga nna Myitkyina ginra masha tsun ai.

September 11 ya shani sha Myitkyina-Yangon sa lam a matu nbungli hpan hta hkan nna tsaw dik manu Sen 9 du mat ai rai nna shawng de gaw Myitkyina-Yangon nbungli lakmat gaw Sen 6 jan sha nga ai re lam chye lu ai.

Dai zawn sha Myitkyina-Mandalay nbungli lakmat manu mung Tsaw nga ai hta Ya aten sen 4 kaw na sen 6 jan lapran nga ai lam chye lu ai.

Bungli masa sha n-ga hkam ja lam, hpaji lam ni a majaw hkrun lam sa na Mung masha ni gaw lam magup yak hkak nga ma ai rai nna ya aten byin nga ai gasat gala a majaw mawdaw lam hta nbungli lam sha shim ai nga nna tsun ai re.

Ya aten Myitkyina-Mandalay mawdaw lam dingyang hta jahkring hkring gasat gala majan byin ai rai nna mawdaw lam lapran mawdaw chyat ai lam ni nga ai majaw law malawng gaw nbungli hku sha madung hkawm sa nga ma ai re.

Mawdaw lam yak hkak ai majaw nbungli hkrun lam hku hkawm sa ai masha law wa ai majaw nbungli lakmat manu grai tsaw wa ai re lam chye lu ai.

Shiga - Htu seng