Ndai Laman Jinghpaw Mung Kata Gasat Gala Majan Zim Taw Ai Masa Raitim Drone Bawm, N Bungli, Laknak Kaba Gap Ai Lam Dingyang Rai Nga Ai Lam

Pajau Media

January 13, 2026

Ndai laman Manmaw hpyen man, Hpakant hpyen man, Waimaw hpyen man ginra ni de gasat gala majan loi zim taw ai masa raitim Myen Hpyen Dap gaw ntsa lam hku drone bawm jahkrat bun ai lam, laknak kaba gap ai lam, n bungli bawm jahkrat bun ai lam gaw dingyang galaw nga ai re hpe chye lu ai.

KIO shiga dap ni kawn tang madun da ai hta lai wa sai January 4 ya kaw nna 11 ya du hkra jinghpaw mung kata na hpyen man ni hta majan zim taw ai masa raitim Manmaw hpyen man, Hpakant hte kaga shawng lam hpyen man hkan Myen Hpyen Dap kawn laknak kaba gap ai lam 205 lang ,drone bawm 29 lang, n bungli bawm 70 lang gap bun ai lam nga ai lam tang madun da ai re.

Lai wa sai bat laman tup Jinghpaw Mung kata majan laja dik ai shawng lam hpyen man ni hta gasat gala majan (2) lang byin ai lam nga ai hte n dai masa hku rai yang gasat gala majan gaw loi zim taw ai masa re lam chye lu ai.

Lai wa sai bat laman hta gaw Hpakant Mai Nawng mare de mung gasat gala byin ai lam nga ai hte Manmaw Sin Kung maga de gaw Myen Hpyen Dap hpyen n-gun htu shadut nna laknak kaba, drone bawm, nbungli bawm ni gap bun ai lam dingyang galaw nga ai re hpe chye lu ai.

Shiga- Pyilan U