Ndai Laman Myen Hpyen Dap Kawn Mung Masha Ni Hpe Masat Shingte Tawn Let Nbungli Drone Ni Hte Gap Gasat Ai Lam Grau Galaw Wa

Pajau Media

May 13, 2025

Myen hpyen dap gaw hpyen hte n seng ai Mung masha ni hpe masat shingte tawn gap gasat nga nna N bungli, Drone bawm ni jahkrat bun ai lam n dai laman grau galaw wa ai re.

May 12 ya shani hkying 10:00 Aten daram hta Sagaing ginra kata na hpaji jawng langai kaw Jet Fighter hte bawm wa jahkrat ai majaw jawng ma, sharin sara num hte rai yang marai (22) asak si sum nna marai (40) jan hkala hkrum ai lam NUG asuya kawn tsun n dau da ai kaw na chye lu ai.

Dai shana hkying 10:45 PM aten daram hta mung TNLA uphkang ginra Man Tung myo Awng Chan Tha lawk kaw mung N bungli bawm a majaw Mung masha langai asak si sum nna dum nta (27) hten za ai lam, May 13 ya shani 10:00 Am aten daram hta mung Rahkai Mungdaw Yathae Tawng myo kata Myen hpyen dap kawn N bungli bawm wa jahkrat ai majaw Ma Kaji, Ma Kanu ni lawm yang marai (13) asak si sum nna Marai (20) hkawt hkala ai lam ginra shiga kaw na chye lu ai.

Mung masa hpyen masa shuk shanut nga ai Mungdan ni hta n myit mada shingra hpyen hkrum sha wa yang shuk shanut ai mung masa hpe gan jahkring nna shingra hpyen masa hpe ning shawng jaw ai lam hpe Mungkan mungdan kawn galaw nga ai masa langai re raitim Myen hpyen dap gaw n dai masa hpe lit la ai lam n nga ai re hpe mung chye lu ai.

Mung masa bawngban jahkrum hkat ai lam hpe kaga aten hkan jahkrup yak ai raitim shingra hpyen hkrum sha nga ai aten hta Mung masa bawngban ai lam hpe galaw na matu manu dik aten mung re majaw NUG asuya hte Rawt Malan Hpung ni hku nna gaw gan gap hkat jahkring ai lam ni n dau lai wa sai re.

Myen hpyen dap mung Nnang Nawn masa hpe ga baw shadu nna gap hkat jahkring ai lam hpe n htoi bai jat n dau ai hta May 6 ya kaw nna 31 ya du hkra gap hkat jahkring n dau da tim Jinghpaw mung, Sagaing sha n-ga Rawt Malan Hpung ni nga ai ginra de shani shagu bawm jahkrat gasat nga ai re hpe chye lu ai.

Ya na zawn aten gadun laman Mung masha law law kalang ta asak si sum mat hkra dingsa gasat na matu matsun ai ni, n dai manghkang hta shang lawm ai ni yawng hpe ja ja ahkyak la lu hkra galaw sa wa na re lam, Mungkan Mungdan kawn mung tang du hkra hkum pat ari jaw ai lam ni galaw sa wa na matu NUG asuya kaw ndau da ai kaw na chye lu ai.

Shiga- Pyilan U