Ndai Laman Myitkyina Muklum Kata Masha Rim Hkrum Ai Lam Jahkring Hkring Byin Nga Ai Lam

Pajau Media

August 20, 2025

Jinghpaw Mungdaw Myitkyina Muklum kata ndai laman Mung masha ni mara kata rim la hkrum ai ni jahkring hkring byin nga ai sha n-ga jep joi ai lam ni mung grai galaw wa ai nga nna Myitkyina ginra masha tsun ai.

"Ndai laman gaw lam hkan jep ai, mara kata rim taw ai lam ni makau grup yin hkan jahkring hkring na taw nga " nga nna Myitkyina ginra na amyu shayi langai mi tsun ai.

Rim hkrum ai law malawng gaw asak naw ram ai amyu shadang ni sha n-ga amyu shayi du hkra lawm ai lam, muklum kata shinggan shara shagu hkan rim nga ai hpe chye lu ai.

Dai sha n-ga gara maga kaw na re n chye ai lak nak lang ai ni Muklum kata shamu shamawt masha rim nga ai re lam mung chye lu ai.

Lai wa sai August 18 ya shani hta mung Myitkyina Shatapru lawk 5 kaw mung ramma La marai 5 hpe mawdaw lahkawng hte du wa ai hpung ni kawn rim la hkrum ai lam nga ai hte dai shani hta sha Manau wang kata sa chyai hkawm ai amyu shayi marai 3 hpe mung rim la hkrum ai lam chye lu ai.

Myen hpyen dap daru magam zing ai hpang Myitkyina Muklum kata lagu lagut lam law wa ai hte hpyen dap ni kawn Muklum kata hte shinggan ni hta jep joi ai lam ni shachyat da ai rai tim ya na zawn mara kata rim la hkrum ai ni gaw Mung masha ni na shing lum lam na matu lani hte lani grau tsang na nga taw ra ai hpe chye lu ai.

Shiga - Hpring