Ndai Laman Waimaw Ginra Majan Masa Zim Taw Ai Masa Re Lam Mung Masha Ni Tsun

Pajau Media

Novemver 12.2025

Jinghpaw Mung Hpakant Manmaw Ginra de shani shagu majan laja nga ai raitim n dai laman Waimaw Lamyang maga de gaw majan masa zim taw ai masa re lam Mung masha ni tsun ai.

"N dai laman gaw Waimaw Lamyang maga de loi zim taw ai, Mung masha lai wa lai sa ni hpe san yu yang mung hpa n ra ai nga, Ra lata poi grai ni wa na kun, Lamyang maga de majan byin yang shani shana sinat kaba gap ai n sen ni, Nbungli Bawm wa jahkrat ai n sen ni asan sha na ai, n dai laman n sen n na ai hpe maram yang majan loi zim taw sam ai" nga nna ginra masha tsun ai.

Manmaw Hpakant ginra hkan gaw Shani shagu Nbungli Bawm laja lana gap nga ai re hte lai wa sai bat laman hta Jinghpaw Mung kata gasat gala majan 35 lang byin lai wa sai re hpe mung chye lu ai.

Ya aten Putao Hkawng Lan Hpu Ginra de mung Myen hpyen dap P.T.Ts pawng hpawm hpung ni hte Rawt malan hpung ni lapran gasat gala majan grai laja nga ai re hte Hpyen n gun mung htu shadut dingyang re hpe chye lu ai.

Hkawng Lang Hpu Ginra kata na hkawm sa hkrun lam mahkrai ni hpe mung Myen hpyen dap hte P.T.Ts pawng hpawm hpung ni jahten ai lam nga ai re hte ya na zawn galaw wa ai gaw myen hpyen dap woi awn ai Ra lata poi hpe Hkawng Lang Hpu ginra kata atsawm sha galaw lu hkra makawp maga nga ai lam re sha n-ga KIA pawng hpawm hpung ni htu shadut shang wa na hpe tsang ai majaw galaw ai re nga nna Ginra masha ni tsun maram nga ma ai re.

Shiga - Pyilan U