Nlung hte Zaibru Htaw Ai Mawdaw Ni A Majaw Muklum Kata Na Lam Ni Hten Wa Ai Lam

Pajau Media

March 17, 2026

Jinghpaw Mungdaw Myitkyina muklum hta nlung hte zaibru htaw ai mawdaw kaba ni a majaw muklum kata na lam ni hten wa ai nga muklum masha ni kawn tsun ai re.

Myitkyina muklum hta hka kaba ai hpe makawp maga ai ngu ai ga baw hte Shatapru, Manhkring, Shwe Zet kaw mali hka na nlung ni hpe Backhoe ni hte htu nna nlung ni hpe mawdaw kaba ni hte htaw la taw nga ai re.

Dai majaw Myitkyina muklum Shatapru lawk, Manhkring lawk, Shwe Zet lawk , Njang Dung lawk hkan hta shani shagu tsa shadang ram nga nlung htaw mawdaw ni lai hkawm nga ai majaw nkau lam ni hten wa ai ngu ginra masha ni tsun ai kawn chye lu ai.

“Dai nlung ni gaw dakkasu jawng shawng masat 3 (A.L.K) jawng makau na hkau na hte japan lam ntsa kaw nga ai MB Bar wang kata hkan sum pum da nna masat 3 (A.L.K) jawng shawng na lam nga yang tsawmra hten taw sai” nga Shatapru kaw nga ai masha langai mi tsun ai.

Htaw sa wa ai nlung ni hpe rap daw rung makau kaw hkan, shatapru japan mahkrai makau kaw nga ai shara, dakkasu jawng shawng na (Chying Hkrang Nawng) hkan htaw sum pum da ai lam hpe chye lu ai.

Nlung htaw ai mawdaw ni a majaw lam ni hten wa ai sha n-ga mawdaw lam nhpu mawng ai majaw mung lam makau seng hpaw ai masha ni a matu mayak nga ai hpe chye lu ai.

Shiga - Zau