Nmawk Ginra Hta Hpyen Nbungli Ni Hte Laja Lana Gasat Nga Ai Hte Mung Masha Si Hkala Ai Lam Nga

Pajau Media Channel

14th May, 2024

Nmawk ginra mayan de lai wa sai May (7) ya kawn Myen hpyen dap hte wunpawng mungdan shanglawt hpyen hpung ni lapran gasat gala majan laja nga dingyang re hte myen hpyen dap gaw nbungli bawm, lak nak kaba hte laja lana htim gasat nga ai hta mung masha si hkala hkrum ai lam nga ai re hpe chye lu ai.

May (14) ya jahpawt hkying (8:00) AM daram hta mung Nmawk Myo Tit mare mayan de nbungli bawm jahkrat bun ai hta Myo Tit mare mung shawa tsi rung makau na dum nta langai kaw wa hkrat kapaw ai hta nta madu wa gaw dai shara kaw nan asak si sum mat ai hte madu jan gaw myi man kaw hkra hkala nna ah dwi dinggai gaw lagaw kaw hkra hkala sawng ai re hpe mung chye lu ai.

Manmaw, Nmawk Myo Tit ginra mayan de lai wa sai May (7) ya daram kawn Myen hpyen dap Hk.L.Y (437) hte KIA pawng hpawng hpyen hpung lapran gasat gala majan grai laja dingyang rai nga ai hta myen hpyen dap kawn lak nak kaba, nbungli bawm ni hkrup mara gap sharu bun ai majaw mung masha dum nta law law hten za hkrum sai re hpe mung chye lu ai.

May (13) ya shani hta mung Manmaw Manje kaw dap jung nga ai balik dap hpe jahpawt hkying (7:00) AM aten kawn KIA pawng hpawng hpyen hpung ni htim gasat ai hta shana hkying (3:00) PM grupyin hta zep zi zing madu la lu sai lam mung chye lu ai. Manje mare masha ni gaw ya aten kadai mung kadai shimlum dum ai shara ni hkan koi yen nga dingyang re hte Manje balik dap hpe zing madu la lu sai raitim Manje kaw dap jung ai Hk.M.Y (601), Hk.M.Y (319) dap kaba ni naw ngam nga ai re majaw gasat gala majan gaw grau grau laja wa na masa nga ai lam chye lu ai.