Nnang Nawn Tsin Yam A Majaw Gap Hkat Gan Jahkring Da Ai Aten Myen Hpyen Dap Kawn Manmaw Ginra De Nbungli Bawm Hte Lak Nak Kaba Shani Shagu Matut Manoi Naw Gap Bun Nga

Pajau Media

April 22, 2025

Myen mungdan kata nnang nawn tsin yam hte Myen shaning n nan aten ladaw laman April 22 ya du hkra lahkawng maga gap hkat jahkring ai lam ndau da ai hta Myen hpyen dap gaw April 21 ya shani du hkra Manmaw ginra de matut manoi gap bun nga ai lam chye lu ai.

April 21 ya shani hkying 3:00 PM aten daram hta mung Manmaw ginra de nbungli bawm lahkawng lang sa gap ai rai nna shana daw hkying 5:00 PM aten daram hta gaw lak nak kaba gap bun ai re hte Drone bawm ni jahkrat bun ai lam dingyang galaw nga ai hpe shawng lam shi sawk ni kaw na chye lu ai.

Jinghpaw mung kata hta KIA maga na gaw gap hkat gan jahkring da nhtawm April 22 ya du hkra htu shadut htim gasat ai lam n nga ai raitim April 23 ya hkan na gaw majan masa gara hku galai shai wa na hpe n lu tsun ai re. Raitim ginra mung masha ni gaw Muklum kaba ni de du hkra majan laja wa mai ai lam tsun garu nga ma ai re.

Maga mi hta Muklum kaba hkan shanu nga ai Mung masha ni mung aten hpring hpyen masa sadi maja let nga ra ai lam Mung masa maram masam ai salang ni tsun nga ma ai re. Grau nna gaw aten ntam, shara n lata du wa chye ai nbungli hpyen hpe sadi maja ra ai lam tsun ai re. Hpyen man lahkawng maga kawn gan gap hkat jahkring n dau da ai lam gaw dai ni April 22 ya shani hpang jahtum rai sai re.

Shiga- Pyilan U