Nshung Ladaw Hta Hpyen Koi Yen Mung Masha Ni Lum Palawng Malu Masha Ni Grai Ra Kadawn Nga Ai Lam

Pajau Media

December 11, 2025

Jinghpaw Mung kata majan gaw lani hte lani laja nga ai hta hpyen koi yen mung masha ni mung buga de wa na masing gaw tsan ai hta tsan rai nga ai hte ya aten n shung ladaw hpyen koi yen mung masha ni lum palawng ni hte malu masha ni grai ra kadawn nga ai lam chye lu ai.

Nam Mati ginra de hpyen koi yen wa ai Hpakant lam mayan hte Danai lido lam mayan hkan na Mung masha ni gaw lum palawng hte malu masha ni ra kadawn nga ma ai lam, grau nna gaw dum nta masha law ai ni gaw nshung ladaw lum palawng gu gu ra ra lu hpun na matu grai yak hkak nga ai lam, garum ningtum ni mung yawm wa sai re majaw grau yak hkak ai re lam chye lu ai.

Sai hpyen koi yen mung masha ni gaw Jinghpaw Mung Lido lam mayan hte Hpakant lam mayan lai wa sai February shata daram kaw nna Myen hpyen dap pawng hpawm hpung ni hpyen shamu ai lam galaw wa ai majaw hkrit tsang nna hprawng koi yen wa ai ni re hte ya aten du hkra hpyen masa grai naw hkrit tsang ra ai masa re majaw buga de wa na lam n mu shi ai re hpe chye lu ai.

Danai Lido lam mayan de Myen hpyen dap hte P.T.Ts pawng hpawm hpung ni dingyang hpyen shamu nga ai re majaw Dum Bung HKa, Lawa mare, Kum Tsai Yang, Wa Ra Zup, Jahtu Zup mare hkan na mung masha ni Nam Mati ginra de koi yen nga ra ai sha n-ga Hpakant lam Nam Ya hkan na mung masha ni mung lawm ai re hpe chye lu ai. Nam mati ginra hta hpyen koi yen dabang (6) daram nga ai hte ya aten n shung ladaw lum palawng malu masha ni grai ra kadawn nga ai lam chye lu ai.

shiga – Pyilan U