October Shata Laman Amyu Shayi Marai (70) Asak Si Sum Ai Lam

Pajau Media

November 7, 2025

Myen Mungdan ting hta October shata laman Amyu shayi marai (70) Asak si sum ai lam Myen Mung Amyu Shayi Hpung BWU kawn n dau da ai re.

Myen hpyen dap a Nbungli htim gasat ai lam gaw shawng na shata hta grau galaw ai majaw gumshem ai lai ladat hte htim gasat ai lam grau dam lada wa ai re hpe chye lu ai.

Lai wa sai October 6 ya shana Hkying 8 aten daram hta mung Mung Ywar hte Chyaung U jarit Chyaung U ginra na Dingdung daw shara mi kaw Myen htunghkying poi (သီတင်းကျွတ်) Si Mi shachyi hpawng shingra galaw nga ai ni hpe 120 MM ngu maram lu ai Laknak kaba 2 jai lang let Motor hte jahkrat bun ai lam chye lu ai.

Dai mabyin hta Masha marai 22 asak si sum nna Marai 55 hkala hkrum ai re hpe chye lu ai. Dai zawn sha September shata hta mung Myen hpyen dap a gumshem ai lai ladat a majaw Amyu shayi marai 47 asak si sum lai wa sai re.

Shiga - Htu Seng