Online Ntsa Kaw Miwa Jan Tai Na Matu Hte Sponsor Matut Ya Ai Lam Ni Law Wa Ai Lam

Pajau Media

September 18, 2025

N dai laman Online ntsa kaw amyu shayi ni hpe sawt ai facebook accout ni lang nna Miwa Jan tai na matu hte mahkawn kasha ni hpe Sponsor matut ya ai lam grai mu mada wa ai lam Myitkyina ginra masha amyu shayi langai tsun ai re.

Sawt ai facebook accout ni hte hkan shaga nna matut hkawm ai re lam, Jinghpaw laika hte Miwa Lauban ni mahkawn kasha tam shangun ai lam, mahkawn kasha ni hpe sponsor matut ya ai nga nna hkan tsun ai lam law wa ai re.

Ya na zawn hkan tsun ai hta asak kaji nna tsawm ai Myitkyina ginra na mahkawn kasha ni hpe masat shingte tawn nna hkan tsun ai hpe mu mada lu ai rai nna ya na zawn Mung masa, Sut masa grai yak hkak ginchyum chyat nga ai aten amyu shayi sha ni gumhpraw a mayam tai mat na hpe grai myit tsang ai lam dai amyu shayi tsun ai re.

Dai sha n-ga Myitkyina Muklum kata amyu shayi ni law malawng gaw lagut damya manghkang shani shagu ngu na daram hkrum katut nga ma ai rai nna Online ntsa kaw nna masu magaw ai mung hkrum sha nga ai lam chye lu ai.

Ya na zawn hkan tsun ai ni gaw Myen laika, Jinghpaw laika ni hpe kung kyang hkra lu shaga ai rai nna n kau amyu shayi ni a sumla ni hpe jai lang nna online ntsa masu sha, gumhpraw hkoi ai lam ni hkan galaw nga ai lam matut chye lu ai.

Myitkyina Muklum hta n dai laman lagut damya lam ni jahkring hkring byin nga ai rai nna lagut damaya law malawng gaw asak ram ai ramma la kasha ni re lam chye lu ai.

Shiga - Htu Seng