Pat Ja San Magam Bungli Shang Ai Hpang Kaw Nna Man Dawng Mare Kaw Ka-Ni Lu Sha Masha Grai Yawm Wa Ai Lam

Pajau Media

June 24.2025

Jinghpaw Mung Chihpwi Muklum Man Dawng mare kaw KIO asuya Ka-ni nanghpam Pat Ja San magam bungli ni shang wa ai hpang kaw nna Tsa Ya hte Ka-ni lu sha ai masha ni grai yawm wa ai re nga nna Man Dawng ginra masha ni tsun ai.

“ Shawng daw hta N dai mare kaw Ka-ni lu sha ai masha ni, Tsa Ya ni grai law ai, ngut na Lagu lagut lam ni mung grai nga ai, ya gaw mying jahpan hte hkrak Pat Ja San ai lam galaw ai hpang ram ram yawm wa sai, Lagu lagut lam mung n nga ai daram rai wa sai.” nga nna tsun ai

Ya aten Man Dawng mare kaw KIO asuya lit la nna Nang hpam Pat Ja San Komiti hpawg nna Nanghpam lu sha ai masha ni hpe mying jahpan hte hkrak la nna dawn jasan ya ai rai nna Laiza muklum de mung shata kru wunkat la na matu sa ai re lam chye lu ai. Ginra masha ni tsun ai hta Laiza kaw shata 6 dawn jasan hkam la ngut ai hpang bungli bai jaw nna matut gawn hkang nga ai re lam chye lu ai.

“ Ya Man Dawng kaw KIA kawn tsa ya ni hpe du hkra dawn jasan ya ai, lai za kaw shata 6 hpring ai ni hpe gaw Dap shara kaw nna bungli jaw ai, langai gaw nga ai dum nta masha ni nan wa sa ai ni gaw bungli lata na ahkang nga ai” nga nna mung tsun ai.

Mandawng ginra hta KIO uphkang wa ai hpang kaw nna Ka-ni nanghpam Pat Ja San ai lam hpe ja ja galaw wa ai majaw mare kata Ka-ni lu sha masha grai yawm wa sai re hpe mung chye lu ai. Dai zawn sha Miwa Jarit Sadung, Kanpaiti, Chihpwi, Pang Wa, Lagwi, Hpimaw, Gang Fang ginra ni hta Mung masha ni hpyi Shawn ai hte maren Pat Jasan dabang hpaw nna masha marai 500 grup yin dawn jasan hkam la nga ai re hpe chye lu ai.

KIO asuya gaw 2014 April shata kaw nna KIO woi awn ai kata Pat Ja San Komiti ni hpaw nna Ka-ni nanghpam dawn jasan ai lam ni hpe matut manoi galaw wa ai re hpe mung chye lu ai.

Shiga- Hpring