Ptuao Mu Lar Shi Di Mayan Hta Magwi Shazai a Majaw Masha Marai 4 Asak Si Sum Ai Lam Byin Nga Ai Lam

Pajau Meida

April 18,2025

Putao Mu lar shi Di makau Mu lar Di, Ye Kyaw Di mare ni hkan Magwi shazai mare de shang wa ai majaw April 17 ya shana hta mung masha marai 4 asak si sum ai sha n-ga Mung masha dum nta 5 hten za mat ai lam ginra masha ni tsun ai.

“Mani Nam de lahpaw wa dat ai dinggai lahkawng gaw mare makau na nam maling kaw mu ai re, dai kaw na marai langai hpe magwi gabye sat ai, Hkum hkrang pyi ayai aya re mat hkra di kau ai, dai shaloi magwi madu hpe shana da nna hpyen dap na ni hpe gap sat na matu wa tsun ai, hpyen dap na ni mung sinat hpai nna sa gaw sa ai wa n gap ai sha bai n htang wa ai” nga nna putao ginra masha langai tsun ai re.

Shana aten Mu lar Di mare de magwi shang wa ai majaw mare masha ni yawng hprawng ma ai re, n kau n lu hprawng ai asak kaba sai gumgai ni, ma sha-up rawng ai kanu ni gaw n lu hprawng ai ni hpe kalang bai dingsa ai majaw mung masha asak si sum ai madang byin ai re lam matut tsun ai re.

“Dai shani shana jang mare kata de kajawng kaja magwi shang wa ai majaw yawng hprawng ai, nlu hprawng ai ni hpe sat kau ai ga rai nga, n ta mung hten mat ai” nga nna mung tsun ai re.

Ya aten Mu lar Di mare makau hkan Wam dam hkawm nga Magwi gaw kanu hte kasha rai nna shawng de gaw Putao ginra de sut hpaga bungli galaw ai U Tay Za madu ai company kawn madu ai Magwi re hte dai aten Magwi rem ai ni hpe du hkra dingsa wa ai majaw kaga de bai dut shalai da ai magwi re lam ginra masha ni tsun ai kaw na chye lu ai.

Ya na zawn byin wa ai gaw magwi madu ni kawn mung nlu hkang zing mat ai majaw re lam ginra masha ni tsun ai re. Lai wa sai shaning hta mung Myitkyina Putao lam lapran Sum Pyi Yang mare, Hkindu Yang mare mayan Nam magwi Mare de shang wa nna Mung masha dum nta jahten ai lam ni nga lai wa sai majaw dai magwi hpe gap sat kau re.

Ya aten Mu lar Di mare makau wam hkawm nga ai magwi a majaw mung masha ni nam de shang galaw lu galaw sha na matu hkrit tsang ra ai madang byin nga ai hte seng ang ai ni kawn lawan gap sat kau na matu mung mung masha ni ra sharawng nga ma ai re hpe mung chye lu ai.

Shiga- Pyilan U