Putao De San Poi Htai Sa Ai Sumpra Bum Ginra Na Jawng Ma Ni Hkrun Lam Pat Ai Masa A Majaw Nta Nlu Wa Na Hpe Myit Tsang Nga

Pajau Media Channel

14th March, 2024

Gasat gala majan a majaw Myitkyina-Putao mawdaw hkrun lam ni mung pat tawn da ai rai nna ya aten Putao Muklum de tsang 12 (Grade 12) san poi wa htai nga ai Sumpra Bum ginra na jawng ma ni hkrun lam pat ai majaw nta wa lam n mu yak hkak nga ma ai lam chye lu ai.

“Sumpra bum ginra tsang (12) jawng ma ni Putao de san poi wa htai ra ai lahkawng ning daram rai wa sai, dai ning na tsang (12) jawng ma ni gaw shawng ningnan numdaw mi wa htai ai rai nga. Yawng rai yang marai (14) re, srn marai (4), Guide sara ni hte shat shadu jaw ai ni yawng hte rai yang marai (20) jan ai. San poi gaw n dai bat laman ngut na re raitim wa lam gaw naw pat da ai re. San Poi ngut ai hte Jawng ma ni hpe gara de sa ra na re n chye sai” nga nna Sumpra Bum ginra na sara langai tsun ai.

Ya aten hkrun lam pat ai majaw malu masha jarik rawt wa ai sha n-ga htaw shalai la na matu mung yak hkak nga ai masa re. Tsang (12) san poi hpe lai wa sai March (11) kaw nna htai hpang nga sai re hte march (19) ya shani san poi ngut kre na re. Hkrun lam masa gaw galoi aten du hkra pat da na re n chye ai hte aten na wa yang jawng ma ni dum nta de lawan ladan nlu wa ai laman nga shara hte malu masha ni yak hkak wa na masa hpe myit tsang nga ma ai lam mung tsun ai re. Myitkyina-Putao hkrun lam, Sumpra Bum mayan hta lai wa sai (8.3.2024) kaw nna gasat gala majan byin ai hpang dai ginra mayan na mung masha ni gaw kadai mung kadai shimlum dum ai de hprawng koi yen mat sai re.

Ya aten dai ginra mayan pru shang lam ni hpe KIA, KPDF pawng hpawng hpung ni kawn shara la nga ai re majaw hpyen masa gaw shaja hkat nga dingyang re hte galoi aten gara hku byin wa na re n chye majaw mung masha ni gaw sadi maja let nga ra ai masa re lam shi sawk Mali Hku tang madun da ai.

Shiga -Mali Hku