Putao Ginra De Mung Majan Byin Hpang Nga Sai Re Majaw Yawng Sadi Maja Let Nga Ra Ai Lam Seng Ang Ai Ni Tsun Shadut Ai Lam

Pajau Media Channel

9th March, 2024

Wunpawng Mungdan shanglawt hpung (KIA) Dap Ba (1) Putao ginra de mung March ( ya shana daw (2:00) PM daram kaw nna htim gasat majan hpang nga sai hte Sumpra Bum hte Mali Yang lapran Myen hpyen dap hpe shana hkying (11:00) PM daram hta zing madu la sai lam shawng lam shiga kaw na chye lu ai.

Myen hpyen dap Hk.L.Y (46) (ထောက်ပို့စခန်း) kaba hte Posts kasha (3) hpe March ( ya shana daw (2:00) PM daram kaw nna KIA hpyen hpung ni htim gasat ai hta shana (8:00) PM aten daram hta Myen hpyen dap hprawng yen mat ai hte hpyen lang arung arai law law mung ngam kau da ai re lam shawng lam shiga kaw na chye lu ai.

“Ya gasat zing madu la lu ai shara gaw mung masha ni nga ai ginra hte grai ni gahtep ai lam gaw n nga ai, Putao ginra de matut manoi majan gaw byin wa mai ai re majaw dai ginra kaw nga ai mung masha ni hku nna sadi maja let nga ra ai” nga nna mung tsun shadut da ai re.

Mali Yang mayan de majan htim gasat nga ai aten Sumpyi Yang kaw dap jung nga ai Myen hpyen dap ni kawn mare kaw nna shana daw hkying (4:00) PM hta kalang hkying (8:00) PM aten ni hta makau grup yin de lak nak kaji kaba hkrup mara gap shadam ai lam ni nga ai re hpe mung chye lu ai.

“Ya gaw myo mare shara shagu de mung majan byin nga sai re majaw gara de hprawng yen na mung nloi sai, tinang hte seng ai ahkyak ai arung arai hte malu masha ni hpe sha dingyang shajin da let nga ai” nga nna Sumpyi Yang ginra nga mung masha langai mung tsun ai re.

Jinghpaw mungdaw ginra hta wunpawng mungdan shanglawt hpung KIA pawng hpawng hpung ni kawn March (7) ya jahpawt jau kaw nna ginjaw ginra grup yin hte Myitkyina-Manmaw lam, P.T.Ts hpung ni dap shara jahkrat nga ai ginra ni de htu shadut majan baw wa ai hte myen hpyen dap jung ai shara law law hpe zing madu la lu sai re hpe mung chye lu ai.

Putao ginra de gasat gala majan hpang nga sai re majaw kade nna yang mung masha hte ni gahtep ai ginra ni mung aten ntam byin wa mai ai re majaw hpyen shiga ni hpe madat nna sadi maja let nga ra ai lam lit nga ai salang ni tsun sadi jaw nga ai re hte Putao ginra gasat gala shiga masa hte seng nna matut manoi sagawn nga dingyang re.

Shiga - Hugawng Shayi