Putao Ginra Hta Jak Sau Liter Mi Hta 6470 Ks Hte Myen Asuya Kawn Dut Shabra Nga Ai Lam

Pajau Media

25 May 2026

Jinghpaw Mungdaw Myen Asuya kawn Putao ginra hta hkauna galaw ai mung shawa ni hpe jak sau liter mi hpe 6470 ks hte dut ya nga ai rai tim eka mi hta galan 2 ram sha mari na ahkang lu ai hpe ginra masha ni kawn chye lu ai.

May 23 ya shani kaw na Mulashidi lawk hta hkying kru jan hte dut ya nga ai rai nna, htinggaw mi hta galan lahkawng ram sha dut ya taw ai re. Jak sau hpe sun hkauna hte seng ai laika ni hpe hkrak madun nna she mai mari ai re hpe chye lu ai.

Nkau hkauna galaw ai ni gaw maning na zawn nkaja ai sau ni dut ya na hpe tsang taw nga ma ai re.

“Moi nga yang Hkringmang Hkyet Hting Nan shi nan sa wa nna Putao ginra na matu ngu nna sau, diesel hpe ginra manu hta na shayawm na dut ya ai majaw mari wa ai. Rai tim dai sau gaw nkaja ai ni rai taw nga. Hpa mung na na nmai lang ai jak mung naw hten shi ai, dai ning mung dai hku byin wa na hpe tsang ai” nga tsun ai.

Putao ginra hta ya ten jak sau manu ni gaw liter mi hta 15000 ks ram nga nna, Myen Asuya kawn dut shabra ai sau manu gaw chyen mi ram shayawm na bai dut ya nga ai lam hpe chye lu ai.

Shiga-Mali Hku