Putao Ginra Hta Sindan Pa Bang Na Matu Lakmat Atik Anang Htu Shangun Ai Lam

Pajau Media

8 October, 2025

Putao ginra kata Mung shawa Rapdaw hpe madi shadaw ai Sindan Pa bang na matu Mung masha ni hpe atik anang Lakmat htu shangun ai lam chye lu ai.

N dai lam hte seng nna ginra Mung masha ni lapran nchye na ai masa lam, Myit ningmu n bung hkat ai lam ni byin hkrum nga ai hte maga mi de mung ginra uphkang nga ai ni kawn atik anang galaw shangun ai lam ni byin nga ai lam ginra masha langai tsun ai re.

“ Anhte Mung masha ni hku nna law malawng gaw Lakmat htu na matu myit n hkrum ai, raitim n kau gaw Mung shawa Rapdaw, Rudi amyu sha gawng malai tai ai jahpan hta Lakmat htu na gaw myit hkrum ma ai, Hpung Shang Salang gaw ya du hkra kadai re ngu hpe n chye lu ai, Mare Uphkang Salang ni, ginra kata htinggaw tsa lam hpe uphkang nga ai Salang ni hku nna Mung masha ni hpe Lakmat htu na matu grai tsun shadut ai re” nga nna tsun ai re.

Lakmat htu na jahpan hta n nga mat sai nta masha ni a jahpan ni, htawt sit mat sai Mung masha ni a jahpan ni mung lawm nga ai re lam chye lu ai. Dai jahpan hpe October 14 ya shani hpang jahtum tawn nna lakmat htu ya na matu n dau da ai re hpe mung chye lu ai.

Putao ginra hta Ra lata poi hpe shara lahkawng kaw galaw na matu hkyen da ai re hpe mung chye lu ai.

Shiga – Mali hku