Putao Ginra Hta Zing Da Ai Starlink Jak Ni Hpe Gumhpraw Hte Shaw La Nna Bai Lang Nga Sai Lam

Pajau media

December 16, 2025

Lai wa sai bat laman kaw nna Putao ginra kata myen hpyen dap kawn Starlink wifi ni hpe rim zing ai lam ni galaw ai majaw wifi line nlu mat ai re hte Machang Baw ginra hta gaw December 15 ya kaw nna Starlink wifi ni bai mai lang sai re lam ginra masha langai tsun ai re.

“ ya hte na bat tup myen hpyen dap gaw starlink jak ni rim zing ai majaw line nlu mat ai, mani kaw na she line bai lu wa ai re, starlink jak ni hpe zing kau ai hpang jak madu ni kawn sen 15 jaw nna bai shaw la ai da, myen hpyen dap gumhpraw tam sha ai hku she re taw ” nga nna Machang Baw ginra mung masha langai tsun ai re.

Putao ginra hta lai wa sai bat laman M.P.HK ningbaw wa Putao ginra de du wa ai hpang kaw nna Putao ginra kata ja maw ni yawng pat kau ai gaw ya aten du hkra re sha n-ga starlink wifi jak ni hpe mung rim zing ai lam ni galaw wa ai re lam ginra masha ni kaw na chye lu ai.

Ya aten Putao ginra hta myen hpyen dap gaw hpyen masa hku nna shamu shamawt ai lam ni grau galaw wa ai sha n-ga Ja maw hkan na bungli masha ni hpe rim ai lam, Ja htu Backhold ni hpe zing kau ai lam ni galaw ai hte rim woi hkrum ai mung masha n kau hpe gaw Myen hpyen dap kata kaw kaduk ni htu shangun lam ni galaw nga ai re hpe chye lu ai. Ndai laman Putao ginra N Hka Ga ginra maga de mung gasat gala majan byin ai rai nna hpyen masa grai shaja hkat ai masa re lam ginra masha tsun ai kaw na chye lu ai.

Shiga – Pyilan U