Putao Ginra Kata Chyingma Manu Yawm Wa Ai Lam

Pajau Media

November 24, 2025

Jinghpaw Mung Putao Ginra hta pru ai Chyingma gaw tam la na matu yak hkak wa ai sha n-ga manu mung grai yawm wa ai lam chye lu ai.

Lai wa sai shaning hkan gaw wang lu wang lang mai tam hkawm ai raitim dai ning gaw Myen hpyen dap hpyen n-gun htu shadut wa yang gasat gala mai byin wa ai majaw hkawm sa hkawm wa lam ni yak hkak wa ai re hpe chye lu ai.

" Lai wa sai ten hta gaw wang lu wang lang mai sa ai, ya gaw gasat gala nga wa ai majaw kadai mung nau n gwi sa ma ai" nga nna ginra masha tsun ai.

Chyingma hpe Miwa amyu ni law malawng mari ma ai rai nna Tsi galaw ai lam hta jai lang ai sha n-ga shat mai hkan manam pyaw ai sama langai hku jai lang ai re hpe chye lu ai.

Dai ning gaw dut hpaga galaw ai hta mari ai lam yawm wa ai hte lai wa sai shaning hkan gaw Joi mi kaw Sen 7,8 daram nga ai raitim dai ning gaw joi mi kaw Sen 4 grup yin sha nga ai lam chye lu ai.

" shawng shaning hkan gaw Joi mi kaw sen 7,8 nga ai. Dai ning gaw hpa majaw kun n chye sai, Joi mi kaw sen 4 jan daram hte sha dut mari nga ma ai" nga nna ginra masha tsun ai re.

Ya aten Putao ginra hta Chyingma tam ai aten raitim lam amyu myu a majaw Chyingma gaw laning hte laning taw wa ai lam ginra masha ni tsun ai.

Shiga - Hpring