Putao Ginra Kata Ginra Kaw Na Mare Uphkang Lam Du Hkra Uphkang Salang Ni Lata Tang San Ai Lam.

Pajau Media

May 20, 2026

Putao ginra kata hta hpyen dap kawn uphkang salang ni hpe ginra madang kaw na mare uphkang madang du hkra dai ni May 20 ya shani lani mi hta sha kalang ta lata san wa ai lam ginra masha kawn chye lu ai.

Mungdaw asuya a shana ai kaw mare uphkang madang hta mare shagu hta nta shi uphkang kasa hte salang langai hpra lata san shangun na uhpung madang uphkang salang nnan gaw asuya nnan ladaw ten a matu sindan pa jaw lata wa ai lam ginra uphkang salang dingsa langai tsun ai kawn chye lu ai.

“Ndai kalang na uphkang salang lata ai kaw gaw mare langai hpra na nta shi hpe uphkang salang 1 hpe shawng lata shangun ai. Dai ngut yang she nta shi uphpung salang kata kaw na nta tsa lam uphkang salang langai hpe bai lata shangun ai.

Mare shagu kaw na lung wa ai nta tsa lam uphkang salang ni gaw dai hku kalang ta uphkang kasa byin mat ai. Dai kasa ni hpe nta shi uphkang salang kasa ni hte masha kaba kawn sindan pa jaw na lata ya wa ai” nga shi hku na sang lang da ai re.

Dai ni May 20 ya hta Putao ginra ting na uphkang salang ni hpe sindan pa jaw wa nna, 21 ya shani hta sindan pa ni hpe ginwang uphkang rung de tang shawn ra ai rai nna, mungdaw asuya madang de nga ai lam shateng ra ai hpe chye lu ai.

Putao ginra hta mung mare uphkang hpung 14 hte ginra kata lawk 9 hpe uphkang madang hku masat nna hpawng de da ai re.

Shiga-Mali Hku