Putao Ginra Kata Lai Wa Sai Ten Ja Htu Sha Ai Lam N Galaw Na Matu Pat Hkum Da Ai Shara Ni Hkan Du Hkra Ja Htu Ai Lam Grai Galaw Wa Ai Shiga

Pajau Media Channel

27 February 2024

Putao ginra Mali Hka mayan ja htu sha ai lam gaw 2024 shaning n nan daw kaw nna dam lada ai hku galaw wa ai re hte ja htu na matu tsep kawp pat tawn da ai lamu ga shara ni hkan du hkra ja htu ai lam laja lana galaw sha wa ai majaw Mung masha ni a hkai lu hkai sha shara mat wa ai madang byin nga sai lam chye lu ai.

Machyang Baw Mali hka mahkrai lahta daw ginra ni hpe lai wa sai ten hta ja htu ai lam, ladu lai nga hkwi sha ai lam ni n galaw na matu asuya kawn hkum pat da ai re, Myen mungdan uphkang masa galai shai wa ai hpang kaw nna Putao ginra de ja htu hpaga galaw ai lam grai law wa ai re hta sha n-ga lai wa sai Junauary daram kaw nna grau Machyang Baw ginra hta ja htu lauban ni gashun gashe rai du shang wa nna galaw sha wa ai re lam chye lu ai.

Jinghpaw Mungdaw dingdung daw Mali Hka mayan lai wa sai shaning 10 ning daram kaw nna ja htu ai lam hpe gau ngwi ngwi dam lada ai hku galaw wa sai re, dai aten hta gaw hka kau hkan n hkun htu, hka shang nna htu ai ladat ni hte hka hkrang hkan htu ai zawn re ai ni hpe ginhtawng aten hkan grai galaw sha wa ai kade n na ai hpang Miwa lauban ni du shang wa nna jak kaba ni hte grai dam lada ai hku galaw wa ai re hpe mung chye lu ai.

Ya aten Myen mungdan shara shagu hta gasat gala majan byin nna mung masa shuk shanut nga ai aten Putao ginra gaw ginra kata yawng ngu na hta simsa nga ai aten mung re, n dai ginra masa hta ja htu lauban law law shang wa nna grai galaw sha wa ai majaw ginra masha n kau galaw lu galaw sha lam yak hkak nga ai aten re majaw n kau gaw tinang lu da ai lamu ga ni hpe dut sha ai lam ni mung nga ai re hte aten na wa yang jiwoi jiwa prat kaw na makawp maga wa ai lamu ga ni yawng hten za nna hkai lu hkai sha lamu ga pyi mat wa ai madang byin wa nga sai masa hpe ginra madu ni grai myit tsang nga ma ai re hpe mung chye lu ai.

Grai makawp maga lai wa ai Machyang Baw muklum dingdung maga na Htarang Dam mare, Kawng Mu Lung, Man Nu mare kahtawng makau mayan hkan shaning n nan daw kaw nna ja htu lau ban ni grai du shang wa ai re, dai ginra kata ja htu sha ai lam hte seng nna laknak lang hpung lahkawng maga na ni hte Sut Hpaga lauban ni nan myit hkrum nna galaw sha ai re majaw ginra masha ni hpa tsun shaga lawm n mai mat ai masa re lam mung chye lu ai.

Putao ginra hta ya na zawn ja htu ai lam hpe ladu lai galaw sha wa ai masa gaw grai myit n pyaw hpa re, 2024 shaning n nan daw kaw nna gashun gashe rai htu sha wa ai Machyang Baw ginra mayan kaw ja htu sha nga ai masa hpe seng ang ai asuya ni kawn lit la hparan ai lam n galaw yang du wa na 5 ning laman lamu ga tsa lam shadang (80) daram gaw galaw sha n mai hten za mat na masa nga ai nga nna tsun maram da ma ai re.

Machyang Baw muklum gaw Jinghpaw mung dingdung daw ginra hkawm sa hkawm wa grai yak hkak ai ginra langai mung rai nna Jinghpaw, Rawang, Lisu, Sam rudi amyu sha ni hte kaga myen amyu sha ni mung shanu nga ai ginra langai mung re hte masha jahpan hku nga yang masha (9,000) a lahta shanu nga ai ginra langai re. Madung kan bau bungli hte shang gumhpraw hku na hkauna galaw lu galaw sha ai re hte tsi ru, tsi pawt tam let shang gumhpraw tam ai lam, hpun galaw ai lam, nga hkwi magam bungli, ja htu magam bungli ni hpe galaw sha let nga ai ginra langai re hpe mung chye lu ai.

Shiga – Mali hku