Putao Ginra Kata Myen Hpyen Dap Nbungli Pyen Gawai Dingyang Re Sha N-Ga Gap Garum Ai Lam Ni Matut Galaw Nga Ai Lam

Pajau Media

28 November 2025

Putao Hkawng Lang Hpu hte Sumpra Bum ginra sha n-ga Myitkyina lam dingyang hta November shata laman Myen hpyen dap Nbungli bawm jahkrat ai lam ni galaw ai sha n-ga ya aten du hkra n bungli ni matut manoi pyen gawai nga ai majaw ginra masha ni grai myit tsang nga ma ai re.

Lai wa sai November 25 ya shana daw hta mung myen hpyen dap nbungli gaw Myitkyina kaw nna lung wa nna mung masha ni yen kau da ai Wa Dat mare de bawm wa jahkrat ai lam chye lu ai. November shata laman Putao ginra kata n bungli bawm jahkrat ai lam 10 lang daram galaw ai lam ginra masha ni kaw na chye lu ai.

Myen hpyen dap P.T.Ts pawng hpawm hpung ni gaw Hkawng Lang Hpu ginra de hpyen n-gun jat nna htu shadut ai lam grau galaw wa ai re hte nbungli hku nna gap garum ai lam, laknak arung arai htaw lahka ai lam shani shagu galaw nga ai re hpe chye lu ai.

Hkawng Lang Hpu ginra maga de Hpyen Byuha Mu wa nan woi awn nna hpyen n-gun htu nga ai lam shiga mawng ai hpang ya na zawn Putao ginra de pawng hpawm hpyen shamu ai lam grau galaw wa ai re lam ginra masha ni kaw na chye lu ai.

Shiga – Mali HKu