Putao Ginra Kata Myi Hprap Wan Jaw Ai Lam Rap Ra Ai Lam N Nga

Pajau Media

May 20, 2025

Putao ginra hta myi hprap wan man man nlu ai aten shaning hku na wa sai re hte dai ning kaw nna grau sawng wa ai re lam ginra masha ni tsun ai kawn chye lu ai.

“Shawng daw hkan gaw lani mi kaw hkying hkum (4) din nna lawk hte lawk gahti galai jaw nga ai re, raitim ya gaw jaw nan n jaw ai ga rai sai. N kau gaw VIP line hpe Sen (40) jaw nna shawk la ma ai. Shawng daw gaw dai mung man ai zawn rai na ya gaw yawng maren re sai. Wan man ai ngu na gaw Asuya rung ni hte magam gun masha ni nga ai shara hkan sha re sai,” nga nna Putao ginra masha tsun ai.

Myi hprap wan hpe Muklum kata gahti galai rai nna jaw nga ai raitim jaw ai aten mung yup tung yawng yup ai aten hkan sha jaw ai lam ginra masha langai ya na zawn tsun ai.

“Wan jaw ai mung shana yup tung hkying (12:00) kaw nna jahpawt daw hkying (3:00) du hkra jaw ai gaw hpa di sana ma, hpa mung n mai galaw, shani hkan gaw tsep kawp n sa ai, Wan manu gaw man man bai bang ra,” nga nna lahta na ginra masha matut tsun dan ai re.

Putao girna hta Nam Htum hka Maha myi hprap wan jaw nga ai re. Muklum kata hkan na bungli madu n kau gaw VIP lu na matu ja gum hpraw law law jaw nna shawk la ai re. Raitim dai ning kaw na gaw yawng maren rai mat sai lam chye lu ai. Putao ginra hta myi hprap wan man man n lu mat ai majaw myi hprap wan jai lang nna galaw lu galaw sha dut sha nga ai Mung masha ni yak hkak nga ma ai lam Mali HKu shiga jaw da ai kaw chye lu ai.

Shiga- Mali HKu