Putao Ginra Kata Starlink Wifi Ni Hpe Myen Hpyen Dap Rim Zing Ai Lam

Pajau Media

11 December 2025

Putao Muklum kata Myen hpyen dap kawn December 9 ya shani kaw nna mare lawk hkan na Internet Seng ni hkan shakap da ai Starlink Jak ni hpe hkan rim zing ai lam galaw nga ai re hpe ginra masha ni kaw na chye lu ai.

“ Mani kaw nna shiga ni pru wa ai, dai ni gaw Lung Tsawt Lawk hte Nbungli Pa lawk hkan na seng ni yawng ngu na daram kaw shang zing ai, hpa majaw re ngu hpe ntsun ai, gara de hkan la ra na re mung n chye ai” nga nna ginra masha starlink jak madu tsun ai re.

November shata ka-ang daram kaw nna Putao Muklum shara n kau hkan Mytel Phone line hte Internet hpe VPN hte internet mai lang hkra hpaw ya ai hpang ya na zawn starlink jak ni hpe hkan rim wa ai re.

Jinghpaw mung ginra kata Phone Line, Internet line dawm kau ai laning mi jan na wa ai hpang shara law malawng hkan Starlink Internet seng ni law wa ai re hte ya na zawn myen hpyen dap kawn rim zing ai lam, hkum pat ai lam, ahkun hta sha ai lam ni jahkring hkring galaw wa ai re hpe mung chye lu ai.

Shiga – Mali Hku