Putao Ginra Lawk N Kau Hta Ramma Ni Hpe Hpyen Magam Gun Na Matu Myen Hpyen Dap Laika Shadu Ai Lam Galaw Wa Ai Lam

Pajau Media Channel

24th March, 2024

Putao ginra kata Myen hpyen dap n pu uphkang rung kaw nna mare salang ni kawn asak (18) ning hpring sai ni hte (35) ning lapran na ni hpe hpyen magam gun na matu nta di laika shadu ai lai ladat hte galaw hpang nga sai re hpe mung chye lu ai.

Ya na zawn laika shadu hkrum ai lam hte seng nna “Mani sha Uphkang rung kaw nna sindang pa manaw nna mying lawm ai ni a dum nta de saw shaga laika shadu taw sai re. Anhte lawk kaw marai masum mying lawm taw sai. Anhte n bungli daru lawk (4) kaw na mying jahpan hta da ai gaw marai (63) re sai. Marai kade naw lawm na kun n chye sai. Yawng gaw yup n pyaw sha nmu byin nga sai. Myit mung npyaw nga ma ai” nga nna Putao n bungli daru lawk kaw nna mung masha langai tsun ai.

Myen hpyen dap gaw mying jahpan hta da lu sai marai (63) nga ai kaw nna hpyen la galaw na matu marai (3) gaw lata la hkrum ai re lam chye lu ai. Lata la hkrum ai ni hpe March 22 ya shani mare uphkang salang ni kawn nta de saw shaga laika shadu hpang nga sai lam chye lu ai.

N bungli daru lawk mung masha htinggaw (180) jan nga ai re hte myen hpyen la galaw na matu masha pru shang gawn hkang rung hte mare uphkang rung kawn hta la lu ai kaw asak hpring sai ramma marai (63) du hkra hta la lu sai re.

Ginra masha ni tsun dan ai hta myen hpyen dap kawn jahpan hta la ai lam hte seng nna mung masha ni hpe tsun shana ai lam n nga ai sha galoi aten hta la ai ngu hpe mung atsawm n chye ai. Nta de laika du wa ai shaloi she kajawng ai nga nna tsun nga ma ai re. Mung masha ni n chye hkra jahpan hta la nna lata la hkrum ai nga laika shadu wa ai masa a ntsa mung masha ni myit npyaw myit tsang nga ma ai re hpe mung chye lu ai.

Myen hpyen dap kawn mungdan masha shagu hpyen magam n gun n mai ngu ai upadi hpe shagrin dat ai hpang ta tut hkrang shapraw galaw wa ai re hte ya aten Jinghpaw mung shara shagu hta mung mare uphkang salang ni hku nna dum nta di laika shadu ai lam ni laja lana galaw wa ai re hpe mung chye lu ai.

Shiga - Mali hku