Putao Ginra Na Pru Ai Chyingma Dai Ning Laman Manu Grai Rawt Wa Ai Raitim Chyingma Pru Shadang Grai Yawm Wa Ai Shiga

Pajau Media Channel

Putao ginra hta shaning shagu October htum maga kaw nna December shata laman ginra masha ni gaw chyingma tam ai magam bungli hte dang di dang dep ai masa hku shang gumhpraw, tam lu tam sha nga ai re raitim dai ning laman gaw chyingma pru shadang grai yawm wa ai re lam ginra masha ni tsun ai.

Myen hpyen dap uphkang wa ai hpang kawn Mungdan kata galaw lu galaw sha lam ni grai yak hkak mat ai majaw ginra kata shi ladaw hta hkan nna pru ai malu masha ni hpe tam, dut ai lam ni galaw nga ai re, Nshung Ladaw shang wa ai hte chyingma tam ai lam hpe mung dingyang galaw ma ai re hte lai wa sai ten hta gaw tam ai hta hkan nna grai lu ai,dai ning hkan na gaw chyingma pru shadang grai yawm wa ai majaw pu ba ai daram amyat nlu ai nga nna Zi Ra Dam mare masha langai tsun ai . “ Dai Ning gaw Chyingma tam ai masha ni Hka kau mayan hkan shara la da ai, man ai shara pyi n nga ai, poi shingra zawn she re raitim chyingma pru shadang grai yawm ai majaw hkrun lam manu pyi n bai ai” nga tsun dan ai.

Chyingma tam ai bungli gaw Putao ginra masha ni a matu ngang kang ai kanbau bungli gaw n raitim tam lu tam sha grai yak hkak wa ai masa kata Shi Ladaw hta hkan nna shang gumhpraw tam ai magam bungli langai mi re hpe mung chye lu ai.Putao ginra na pru ai Chyingma hpe Miwa mungdan de madung shalai ai rai nna dai ning laman Nga chyu kawk mi hta Lap (35,000) daram du lu ai re hpe mung chye lu ai.

Chyingma hpe Miwa mungdan hta shadu lu shadu sha ai hta law malawng jai lang akyu shachyawn ai re sha n-ga Sinwawp ana (B,C) a matu tsi shatai jai lang ai majaw Chyingma hpe Miwa lauban ni law malawng mari la ma ai re hpe chye lu ai.

Photo credit, FB