Putao Lam Sumpyi Yang Ginra Hta Myen Hpyen Dap Hpyen N-Gun Jahpring Nna Shamu Shamawt Nga Dingyang Rai Nga Ai Lam

Pajau Media

July 9, 2025

Myen Hpyen dap gaw Ya aten Jinghpaw Mung kata na tat sum kau ai shara ni hpe bai htim gasat na matsing hte shara shagu de Hpyen n-gun jahting nga ai re hte putao Myitkyina hkrun lam ntsa Sumpyi Yang mare kaw mung Myen hpyen dap pawng hpawm hpung ni gaw July praw maga kaw nna shamu shamawt ai lam nga ai majaw gasat gala majan laja wa na hpe ginra masha ni myit tsang ai lam tsun ai.

Sumpyi Yang mare kaw dap Jung shara jahkrat nga ai gaw Lai wa sai 2024 shaning May shata kaw nna rai sai hte ya aten Hpyen n-gun jahting nna nga nga ai hta shamu shamawt hkawm ai lam ni nga ai majaw aten n tam gasat gala majan byin wa na masa nga ai majaw sadi nna nga taw ra ai lam Sumpyi Yang ginra masha langai tsun ai.

“ Ya gaw Sumpyi Yang mare Myen wa dung ai majaw Myit tsang nna Hprawng yen ai Laning mi jan wa sai, Hpyen n-gun grai jahting da nna shamu shamawt dingyang, Mare hpe mung tawn kau da ai shani kaw na dai ni du hkra kalang pyi n lu sa yu, Myen hpyen dap ni dingyang shamu shamawt nga ai re majaw sadi maja nna nga ra taw ai masa re” nga nna Sumpyi Yang ginra masha langai tsun ai re.

Sumpyi Yang kaw Dap Jung nga ai Myen hpyen dap P.T.ts pawng hpawm hpung ni gaw makau mayan de shamu shamawt ai lam ni nga ai re majaw aten ntam majan byin na hpe myit tsang ai re. dai sha n-ga Putao Lung Sha Yang kaw dap jung ai Myen hpyen dap hpung ni mung hpyen n-gun hpring hpring hte nga taw ai masa re lam chye lu ai.

Putao Sumpra Bum ginra hpe KIA pawng hpawm hpung ni Zing madu ngut ai hpang Myitkyina Putao hkrun lam ntsa de Putao maga de na Hpyen n-gun ni shayu la nna Sumpyi Yang kaw N-gun jahpring shamu shamawt nga ai re. N dai laman Myitkyina Putao hkawm sa hkrun lam Lapran na Tang Hpare ginra hta mung lai wa lai sa Mung masha ni hpe laja lana Jep joi nna Putao, Sumpra Bum, N jang Yang Mung chying masat lang da ai ni hpe sha lai hkawm shangun ai masa re nna grai yak hkak ai lam hkrun lam hkawm masha ni tsun ai re.

Shiga- Pyilan U