Putao, Lang Se Ginra Maga De Marang Htu Sawng Nna Hka Kaba Nga Ai Lam

Pajau Media

July 9, 2025

Jinghpaw Mung Dingdung daw ginra rai nga ai Putoa Lang Se ginra de n dai laman Marang htu sawng ai majaw Hka kaba nga ai sha n-ga Lamu ga gyi ai lam ni mung jahkring hkring byin nga ai lam chye lu ai.

“ N dai laman Marang matut manoi htu sawng ai majaw Putao Lang se maga, ngut na Hpimaw Pang Wa lam mayan ga gyi manghkang ni jahkring hkring byin nga ai ” nga nna Lang Se ginra nga langai tsun ai.

July praw laman hta mung marang matut manoi naw htu nga ai rai nna Hka kaba ai majaw Mare kahtawng n kau kaw hka du shang ai gaw ya aten du hkra re hte marang gaw matut naw htu nga dingyang re.

Ya aten Hpakant Lawng hkang Lungseng htu sha ai ginra hkan mung marang matut manoi htu ai majaw U ru hka kaba nna Mung masha dum nta n pu hkan Hka hpring wa ai re lam mung Hpakant ginra masha langai tsun ai.

“ Ya Hpakant lawng hkang ginra de mung Marang htu sawng ai majaw Mani shawng shani kaw nna Hka tung kaba wa sai, Lawk hkan Hka ni hpring mat sai, marang matut manoi htu ai majaw Hka gaw n dai hta grau kaba wa na masa nga ai” nga nna tsun ai.

Dai sha n-ga Hpakant Hpa Pin Jak li daru kaw mung hka tung kaba taw ai majaw Jak ni n mai shalai taw ai lam chye lu ai. Jinghpaw mung ginra hta mung June praw laman hta Myitkyina Lamu ga nem ai shara ni hte Chihpwi, Sadung ginra hkan bum Hka Tung kaba wa ai majaw Hka hpyen hkrum ai sha n-ga Lam grai hten za mat ai re.

 Ya mung marang matut manoi htu wa yang Hka bai kaba wa na hpe Mung masha ni myit tsang nga ma ai re hte ya aten Myitkyina ginra hta Mali hka Tung kaba ai masa gaw Myit tsang ra ai shadang (1,200) Cm de du matu Pe (16) daram sha ra sai lam mugn chye lu ai.

Shiga- Hpring