Putao, Lung Sha Yang Mare Hta Hka Si Hka Gai Kaba Ai Majaw Hkauna Acre (100) Jan Hten za Mat Ai Lam

Pajau Media

13 June 2025

Putao, Lung Sha Yang mare hta lai wa sai June shata praw hta marang htu sawng wa ai majaw Mali hka hte rau hka shi, hka gai ni kaba sawng wa ai nna dai ginra masha ni a hkauna Acre (100) jan ram htenza mat ai lam hkauna madu ni tsun ai kawn chye lu ai.

“ lai wa sai bat hta Mungyet hka kaba ai gaw shawoi shaning na hta grau kaba ai, bai nna hka kaba ai mung shawoi shaning na hta grau jau ai. Anhte ni hkauna pi nhtu shi ai. Hkauna hka hkawng ni, hkauna ni hte hkauna pa yawng ting lawm mat ai.” nga hkauna madu langai tsun ai re.

Lungsha yang mare na Mungyet hka makau na Mungyet dan hta nga ai hkauna Acre (100) jan ram gaw hka hta lawm mat nna, htenza mat ai majaw ginra masha htinggaw (35) ram gaw hkauna mat mat nga ai lam lahta na hkauna madu sha matut tsun ai re.

“ dai hkauna pa hta gaw htinggaw (35) ram nga na re. Galaw sha na hkauna nnga mat sai. Shawng shaning gaw ya na zawn hkauna galaw ai aten jak sau manu rawt na jamjau ai, dai ning gaw hkauna ni mung lawm mat ai.” nga tsun ai re.

Lungsha Yang mare hta mare masha ni hkauna Acre (3000) jan ram hte galaw lu galaw sha nga ai re na, ndai shaning gaw hka kaba nna Acre (100) jan ram htenza mat ai re lam chye lu ai. Dai majaw hkauna galaw nna tam lu tam sha ai ginra masha ni yakhkak nga ai re lam tsun ai re.

Putao, Lung Sha yang mare hta mare masha marai (5000) jan hte, htinggaw (800) jan shanu nga ai mare kaba langai re nna, Putao ginra hta numbat lahkawng kaba htum mare re lam mung chye lu ai.

Shiga – Malihku