Putao Machyang Baw Ginra Kata Hti Hka Mahkrai Kaw Shara La Nga Ai Myen Hpyen Dap Gaw Lai Wa Lai Sa Ni Hpe Jep Shatsang Ai Lam

Pajau Media

January 30, 2026

Putao Machyang Baw mare hte Alang Ga lapran kaw nna Hti Hka kaw shara la nga ai Myen Hpyen Dap hpung ni gaw lai wa lai sa mung masha ni hpe san jep jahkrit shama gumhpraw hpyi ai lam ni galaw ai majaw ginra masha ni hkawm sa hkrun lam hta shim lam n nga myit tsang let sha hkawm sa ra ai lam ginra masha ni tsun ai kaw na chye lu ai.

Lai wa sai ten hkan gaw dai ginra kaw Myen Hpyen Dap shara jahkrat nga ai lam n nga ai majaw wang lu wang lang mai hkawm sa ai raitim 2025 shaning htum wa maga kaw nna myen hpyen dap P.T.Ts pawng hpawm hpung ni gaw Htang Ga lai hkan du hkra shara la shamu shamawt wa ai majaw mung masha ni hkawm sa hkrun lam grai dut dang mat ai re hpe mung chye lu ai.

Ya aten Myen Hpyen Dap pawng hpawm hpung ni dai ginra kata shamu shamawt hkawm nga ai sha n-ga jep joi ai lam, Jep joi ai aten mu sawk la ai gumhpraw ni hpe mung zing la kau ai lam ni galaw ai majaw shimlam n nga ai re hpe mung chye lu ai.

Myen Hpyen Dap pawng hpawm hpung ni gaw Machyang Baw ginra Htang Ga, Alang Ga mare lai daram du hkra shara la shamu shamawt wa ai gaw lai wa sai 2025 October shata daram kaw nna rai sai hte dai hpang daw kaw nna sinpraw hkran ginra hkawm sa hkrun lam ni pat kau ai gaw ya aten du hkra re.

Hkrun lam pat da ai re majaw ya aten ginra masha ni Shau Gaw si di dut sha ra ai aten raitim hkrun lam mayak a majaw shawoi shaning na zawn n lu dut sha ai lam tsun ai re.

Shiga- Pyilan U