Ra Lata Poi Upadi Hte Rim Hkrum Ai Masha Marai 404 Du Hkra Nga Wa Ai Lam

Pajau Media

22 January 2026

Myen Hpyen Dap shagrin dat ai ra lata poi upadi hte rim hkrum ai masha marai 404 nga wa sai lam January 21 ya shani Nay Pyi Taw kaw galaw ai ra lata poi aten laman shimlam hte seng ai Komiti zuphpawng hta Myen Hpyen Du Tun Tun Naung tsun ai re hpe mung chye lu ai.

Ra lata poi upadi hte rim hkrum ai masha marai 404 nga ai hta La marai 324 hte Amyu shayi marai 80 lawm ai lam chye lu ai. Myen Hpyen Dap a ra lata poi hte seng ai upadi hpe lai wa sai 2025 July shata htum maga kaw nna shagrin dat ai rai nna upadi hpe tawt lai ai rai yang yawm dik htawng dam 3 ning kaw nna si ari du hkra jahkrat masat mai ai lam shagrin dat ai re hpe mung chye lu ai.

Ya aten ra lata poi daw 1,2 hpe gaw awng dang ai hte galaw la lu sai rai nna naw ngam ai daw 3 hpe gaw January 25 ya shani matut galaw sa wa na re lam chye lu ai.

Shiga – Hpring