Putao Mawdaw Hkrun Lam Laja Lana Jep Ai Majaw Hkawmsa Lam Grau Yak Wa Ai Lam

Pajau Media

September 25, 2025

Myitkyina Putao Hkrun lam gaw mawdaw hte rai yang lani mi hte du ai hkrun lam raitim n dai hpang daw de laja lana jep ai lam ni a majaw lam lapran kaw lana mi yup yang she du ai lam Putao ginra masha ni tsun ai.

"Ya gaw atsin ayang jep ai, mawdaw kaw htaw ai arai ni yawng hpe jep ai, Tang Hpare Shagyit kaw ma grai jep ai, shanhte n tsen n hten ai masha ni hpe grau jep ai, shana hkying 6 kaw na gaw bai n shalai ai, dai sha n-ga Gate shagu ngu na daram kaw hkring jep ai majaw mung re lani mi hte n du sai" nga nna hkrun lam hkawm ai Putao ginra masha tsun ai re.

Putao kaw na yu wa maga gaw Tang Hpare Gate kaw hkying 6 hpang daw n shalai ai majaw Tayang Zup kaw yup ra ai re. Tang hpare shagyit kaw gaw yu wa ai ni hta lung wa ai ni hpe grau jep ai re lam chye lu ai.

Dai zawn sha Putao de lung maga mung Putao Tan Ja Gate kaw aten masat nna she lai shangun ai re majaw putao lung wa maga gaw gara kaw yup ra na kun gaw n chye shi ai nga nna mung tsun dan ai re.

Mung masa shuk shanut ai hta hkawm sa hkawm wa lam ni grai jep joi ai majaw putao hkrun lam hkawm sa hkawm wa mung moi na zawn lani mi hte n du sai nga nna ginra masha ni tsun ai re.

 Grau nna Tang Hpare Gate kaw lahta daw lung wa ai ni hpe grau jep shatsang ai majaw Yi Sun galaw ai lam, Ja htu Ja shap kan bau bungli galaw sha nga ai Mung masha ni grai yak hkak nga ma ai re hpe mung chye lu ai.

Myen hpyen dap gaw hkawm sa hkrun lam hkan sha n-ga muklum hkan du hkra jep joi ai lam galaw ai re hte n dai laman gaw Phone jep ai lam laja lana galaw nga ai re hpe chye lu ai.

Shiga - Pyilan U