Putao Mu Lar Di Mare Kata Dam Hkawm Ai Magwi Shazai Hpe Lu Gap Sat Kau Sai Lam

Pajau Media

April 21.2025

Putao Mu Lar Di mare kahtawng mayan Mung masha asak si sum ai sha n-ga dum nta jahten ai Magwi shazai hpe April 21 ya shani lu gap sat kau sai lam chye lu ai.

Dai magwi gaw Mu Lar Di mare mayan de April 16 ya daram kawn mare makau mayan de du shang wa ai re hte Mung masha marai (4) hpe sat kau nna marai langai gaw kajawng malap mat nna asak si sum mat ai sha n-ga Mung masha dum nta 5 mung hten za mat sai re. Dai Magwi hpe Putao ginra P.T.Ts ni lit la nna gap sat kau sai lam chye lu ai.

Putao ginra de lai wa sai shaning ni kaw nna Magwi shazai ni mare kata shang nna Mung masha dum nta jahten ai lam, masha asak du hkra ding sa wa ai majaw Myitkyin- Putao lam lapran kaw mung Magwi langai hpe gap sat kau lai wa sai re.

Mare de du hkra du shang wa ai Magwi shazai ni hpe lu gap sat sai raitim nam hkan mung Magwi shazai ni naw mai nga ai majaw grai naw sadi maja ra ai lam ginra masha ni tsun ai re. “Shawng shaning hkan mung Myitkyina hkrun lam ntsa nga hkawm ai Magwi shazai hpe lu gap sat kau sai re. Raitim nam hkan naw ngam taw ai. Magwi hpyen ni grai naw sadi maja ra na tai ai,” nga nna tsun dan ai re.

Magwi hpyen grai tsang ra ai majaw Mung masha ni gaw Mu Lar Shi Di maga de hprawng koi yen mat ai laman mare dum nta kata arung arai lagu hkrum ai lam ni byin ai re hpe ginra masha ni tsun ai kaw na kahtap chye lu ai.

Ya aten dai Magwi hpe lu sat kau sai majaw Mung masha ni tinang dum nta de bai wa nga sai raitim hten za mat ai dum nta ni hpe bai gaw gap ai lam hta ra kadawn nga ai lam law law re hpe ginra masha ni tsun ai kaw na chye lu ai.

Shiga – Pyilan U