Putao Muklum Masha Htawt Shang Jep Ai (Immigration) Rung Kawn Mayun Kumhpa Sha Ai Majaw Ginra Masha Ni Mayak Hkrum Nga Ai Lam

Pajau Media

14 May, 2026

Putao muklum masha htawt shang jep ai rung hta bungli galaw ai ni gaw ya ten mung masa simsa lam nnga ai masa hta mungdan masha mungchying masat, dinghku jahpan masat laika zawn re hte seng na sa du galaw ai hta, mi na hta grau yak nga ai sha n-ga mayun kumhpa sha ai law wa ai majaw ginra masha ni mayak hkkum nga ai hpe chye lu ai.

Mungdan masha mungchying masat galaw na matu sen 3 kaw na sen 5 lapran ma ai sha n-ga laga shawk shawn laika pa galaw yang mung rung matu kumhpa bang na ngu ai gabaw hte mayun kumhpa jaw ra nga ai hpe chye lu ai.

Putao ginra na ginra masha langai tsun ai hta “ yaten Pru Shang Jep (immigration ) rung kalang sa na matu ngarai de shang ai zawn she re moi nga yang laning mi hta kalang shawa ni a ra rawng ai mungchying masat, dinghku jahpan masat laika zawn re ni hpe majoi galaw ya ai. Ya gaw dai hku nnga sai tinang hkrai seng ang ai rung sa na sa shawk la ra ai. Mungchying masat langai galaw ya na matu wa jawng ma ni kaw na hkawt yawm hktum mun mali jaw ra ai dai pi card manu sha naw re, kaga tsang hte tsang gumhpraw jaw ra taw nga.

Uphkang munggyi a lekmat la ai tsang kaw na gunhpraw jaw ra ai, masat da ai lam gaw nnga tim shanhte ra ai hku hpyi ai, dinghku jahpan masat laika sharai ai, mat na bai galaw ai ni, mying nnan bang ai ni kaw na hkawt kumhpa ngu na sen hku jaw ra. Dai kaw masha yu na hpyi ai mung nga ai. Laika pa langai shawk shagu tinang hpe rung shinggan de shaga le nna kumhpa kade bang na lahta na sara ni hpe jaw ra ai nga ti na jahpan jum ai wa kawn tsun na hpyi ai, kumhpa ngu sha tsun na jaw ai hte nlaw yang dai hte sha wa i? sen mi sen hkawng ram gaw galaw u ngu nna nan hpyi sha nga ai. Mare de na yak nga ai dinghku ni na matu kaja nloi ai” nga tsun ai.

Mungchying masat shawk da ai hta mung amyu myu hku tsun nna gumhpraw hpyi sha ai ni, dinghku jahpan masat laika kaw na nnga mat ai majaw mying hpyet na matu kaw na hkawt mun hku jaw ra ai. Rung laika pa ni hpe majoi mari shangun ai, laika pa copy galaw shangun ai mayun kumhpa nlu jaw yang lam amyu myu hte aten nhtoi shana ai zawn re ni galaw nga ai hpe chye lu ai.

Putao ginra kata rai manu, sau manu ni ladu lai tsaw lung nga ai ten ya na zawn asuya rung ni, hpaji jawng, tsi gawk hkan hta mung ladu lai mayun kumhpa sha ai ni law wa ai majaw ginra masha ni mayak hkrum nga ai hpe chye lu ai.

Shiga-Mali Hku