Putao-Myitkyina Nbungli Latmat Manu Bat Mi Laman Ladu Lai Tsaw Lung Wa Ai Lam

Pajau Media Channel

5th, March , 2024

Putao-Myitkyina nbungli hkrun lam latmat dut mari ai lam gaw march (4) ya daram kaw nna shawoi na manu hta (80,000) daram du hkra tsaw lung wa ai re lam ginra masha ni tsun ai kaw na chye lu ai.

“Lai wa sai February shata htum daram du hkra rai yang nbungli latmat manu (160,000) daram hte lu ai re, March (4) ya shani kaw nna nbungli latmat (240,000) daram du hkra tsaw lung wa ai re” nga nna Putao ginra masha ni tsun ai.

2021 Mungdan Uphkang masa n galai shai shi ai aten hkan gaw nbungli latmat sen mi npu sha re, raitim mungdan uphkang masa galai shai wa ai hpang kaw nna lani hte lani tsaw lung wa ai re hpe mung chye lu ai.

Putao-Myitkyina nbungli hkrun lam gaw lai wa sai 2023 shaning kaw nna (Myanmar National Airline) langai sha hkawm sa nga ai re hte bat mi hta kalang ram sha hkawm sa ai re majaw nbungli latmat mari la ai hta grai yak hkak wa ai re lam hkrun lam hkawm masha langai tsun ai re.

“Lai wa sai March (2) ya shani kaw nna Putao-Myitkyina nbungli hkrun lam mung dawm ai madang byin mat ai re hte bat mi hta kalang ram sha hkawm sa ai re majaw n bungli latmat mari ai lam hta grai chyat mat ai, shata mi daram kaw nna jau tau latmat mari da ra ai” nga nna tsun dan ai re.

Lai wa sai ten hta gaw bat mi hta masum lang ram hkawm sa taw ai re majaw hkawm sa hkrun lam hta lawan ladan mai hkawm sa ai, n dai hpang daw de gaw nbungli hkrun lam langai sha hkawm sa taw ai re majaw dut dang lam law law nga ai lam mung chye lu ai. Myitkyina-Putao hkawm sa hkrun lam hta nbungli lam, mawdaw lam mai hkawm sa ai re, Mung masa n pyaw wa ai hpang kaw nna mawdaw hku hkawm sa ai hkrun lam hkawm masha ram ram yawm mat wa ai re hte nbungli manu tsaw jat ai hte mari la na matu yak hkak ai masa hta hkawm sa hkrun lam hkawm ai ginra masha ni grai yak hkak nga ma ai re hpe mung chye lu ai.

Shiga - Mali HKu