Putao Myo Lawk Ni Hta Shana Pru Hkawm Ai Lam N Galaw Na Matu Myen Hpyen Dap Ndau

Pajau Media Channel

11th April, 2024

Myen hpyen dap kawn April 9 ya kawn Putao ginra kata shana de hkying (7:00) PM kaw nna shinggan pru hkawm ai lam n galaw na matu ndau wa ai re hte myen hpyen dap gaw shana hkan gawan ai lam, jep joi, rim ai lam ni galaw hpang sai re lam chye lu ai.

Ya aten Putao ginra hta myen hpyen dap galaw nga ai masa lam hte seng nna ginra masha langai tsun ai hta “Myen hpyen dap gaw shana de hkying (6) jan kaw na hkan gawan nga sai. Hkying (7:00) PM daram kaw na lam braw hkan pat na masha hkan rim ai lam galaw ai. Ya hte shawng n nan ndau ai shana hta mung n bungli pa lawk kaw na ramma marai (4) daram lawm mat ai, grai sadi maja ra ai” nga nna tsun dan ai re.

March shata praw daram kawn Putao myo lawk ni de Myen hpyen dap, P.T.Ts pawng hpawng hpung ni gaw mungdan masha shagu hpyen magam gun na lam hte seng nna nta di di laika shadu shaga wa ai hpang daw de kawn ramma law malawng gaw hprawng koi yen hkawm nga ai re hte myo mare kata ramma pyi n nga ai daram re sai re. Myo mare kata asak kaba sai ni hte asak n hpring shi ai ma ni sha law malawng nga sai re lam mung chye lu ai.

Myen hpyen dap npu na Putao ginra sin P.T.Ts hpung ni kawn mung Putao, Machyang Baw ginra kata nga ramma ni hpe P.T.Ts hpung de lawan ladan shang wa nna tinang ginra lamu ga hpe tinang makawp maga uphkang sa wa ga nga nna tsun shadut ai lam ni galaw nga dingyan re lam ginra masha ni tsun ai kaw na chye lu ai.

Shiga- Mali Hku