Putao N Hka Ga Ginra De Hpyen Masa Bai Shaja Hkat Wa Ai Lam

Pajau Media

January 19, 2026

Myen Hpyen Dap gaw maga mi de tara shang asuya tai lu hkra ra lata poi galaw shakut nga ai raitim Jinghpaw Mung kata gasat gala majan gaw grau laja wa ai hte Masat 1 Dap Ba ginra N Hka Ga mayan de mung hpyen masa shaja hkat nga ai majaw ginra masha ni myit tsang nga ma ai re.

Putao sinpraw hkran ginra gaw ya aten hkawm sa hkrun lam ni yawng pat da ai aten na wa sai hte hkrun lam pat mat ai kaw nna mare de n lu wa, chyat nga ai ginra masha n kau gaw N hka Ga lam hku nna wa na matu hkyen nga ma ai raitim hpyen masa bai shaja hkat wa ai majaw ginra masha ni myit tsang nga ma ai re lam chye lu ai.

“Mare n lu wa ai mung grai na sai majaw N hka Ga lam hku nna wa na matu hkyen da ai, Machyang Baw kaw nna jak li kaji hte mali hka hku N hka Ga du hkra , ngut na lagaw lam bai hkawm wa, dai hku sha mai sai, Htang Ga lam gaw galoi she hpaw na mi re” nga nna Marawt mare masha langai tsun ai re.

Lai wa sai bat laman hta mung Masat 1 Dap Ba Ginra N hka Ga hpyen man maga de gasat gala majan byin ai lam nga ai re hte hpyen masa matut shaja hkat nga ai re majaw N hka Ga lam hku nna lai wa lai sa galaw na mung masha ni myit tsang nga ma ai re hpe mung chye lu ai.

ya aten Jinghpaw Mung kata Manmaw, Hpakant, Waimaw hpyen man sha n-ga Masat 1 Dap Ba ginra Putao N hka Ga, Masat 2 Dap Ba ginra Lapu Hka mayan de mung gasat gala majan byin ai lam chye lu ai. January 12 ya kaw nna 18 ya du hkra Jinghpaw mung kata gasat gala majan 12 lang byin ai lam nga ai rai nna Myen Hpyen Dap gaw gasat gala majan hta n bungli, drone bawm ni hpe madung jai lang gasat nga ai re hpe mung chye lu ai.

shiga: Pyilan U