Putao Pan Nan Din Ginra Na Htalar Htu Mare Nta Yawng Ngu Na Daram Hka Hta Yawng Lawm Mat Ai Majaw Yak Hkak Nga

Pajau Media

June 3, 2025

May shata hpang jahtum bat laman kaw nna htu sawng wa ai marang a majaw bum hka ni kajawng kaja tung kaba wa nna Putao Pan Nan Din ginra Htalar Htu mare masha ni a dum nta yawng ngu na daram hka yawng lawm mat ai majaw ya aten grai yak hkak nga ma ai re lam chye lu ai.

 Htalar Htu mare gaw Putao Pan Nan Din ginra kata na mare kawhtawng langai mi re hte htinggaw (14) shanu nga ai mare kahtawng re. Lanam marang htu sawng ai majaw Htalar Htu mare masha ni a dum nta (10) gaw hka hta yawng lawm mat nna ya aten garum ningtum grai ra kadawn nga ma ai lam ginra tsun da ai re.

“Htalar htu mare gaw hka yawng lim mat ai htinggaw (10) a nta ni hka hta lawm mat ai. Dai majaw ya aten ni nawn ai mare kahtawng hkan na ni hte Putao ginra masha ni sa du nna gan nga na dum nta bai gaw gap magang nga sai re,” nga nna garum shingtau sa ai salang langai tsun dan ai re.

Htalar Htu mare masha ni gaw ya aten lu na sha na, jai lang na arung arai kaw na hkawt hka kaw lawm mat ai re majaw grai yak hkak nga ma ai re. Htalar Htu mare gaw lai wa sai 2022 March shata hta mare ting wan hpyen tsin yam hkrum sha lai wa sai re hte wan hpyen tsin yam hkrum ai kaw tsam mari lawt hkra shakut nga ai aten kalang bai hka hpyen tsin yam a majaw jam jau hkrum nga ai mare kahtawng langai re.

Lanam marang a majaw mare langai hte langai matut da ai Mahkrai ni, yi sa yi wa mahkrai ni (5) daram mung hka hta yawng lawm mat ai lam chye lu ai. Htalar Htu mare hta htinggaw (14) shanu nga nna masha 80 grup yin shanu nga ai mare kahtawng langai re.

Htalar Htu mare gaw Nawng Mun kaw nna 7 ya 8 ya daram cycle jawn, lagaw lam hkawm rai nna sa du ra ai shara langai re hpe mung chye lu ai. Dai ning na laman sha marang a majaw Putao kaw nna Dinghkyet mare hta bum hka tung wa ai majaw mare de du hkra hka tung kaba wa ai re lam chye lu ai.

Dai ning gaw Putao ginra hta bum hka tung kaba ai lam gaw sawng dik madang byin nga sai re. Matut nna mung lanam marang htu sawng wa mai ai re majaw grai sadi maja ra ai lam ginra masha ni tsun nga ma ai re.

Shiga – Pyilan U