Putao Sinpraw Hkran Ginra Lam Nhpaw Shi Ai Re Majaw Ginra Masha Ni Malu Masha Grau Yak Hkak Wa Na Hpe Myit Tsang Ai Lam

Pajau Media

11January 2025

Myen Hpyen Dap gaw Putao sinpraw hkran ginra Htang Ga lam maga de shara la wa ai 2025 October shata kaw nna hkawm sa hkrun lam pat mat ai gaw ya aten du hkra re hte ginra masha ni gaw ya aten gara de mung n mai hkawm sa rai nna mare kaw lu ai hpe sha nna nga taw dingyang re lam Marawt mare masha langai tsun ai re.

“Gara de mung n mai hkawm sa ai shata kaba re wa sai, ya gaw mare kaw lu ai hpe sha chyawm sha, jum sau shakau ni mung moi kaw nna htaw da ai hpe sha naw sha taw ai re, dai ni ma mat yang gaw gara hku di na kun nchye ai, lam gaw n hpaw rai myit ru hpa rai sai law” nga nna Marawt mare masha langai tsun ai re.

Ya aten hpyen dap ni gaw Htang Ga mare hte ni gahtep ai shara hkan shamu shamawt nga ai re hte hkrun lam ni hpe mung pat da dingyang re. Dai hkrun lam hpe lai wa sai 2025 October shata 11 ya Htang Ga mare lai ai kaw ang katut gasat gala majan byin ai hpang kaw nna lam pat da ai gaw ya aten du hkra re.

Sinpraw hkran ginra masha ni gaw Bum Yi, Hkauna galaw nna jum, sau, shakau ni hpe gaw Htang Ga lam hku Machyang Baw, Putao ginra kaw na htaw shalai sha ai re hte ya na zawn lam pat mat ai majaw dut lu dut sha shang gumhpraw lu lam yawng pat mat nna yak hkak nga ma ai masa re hpe mung chye lu ai.

Ya aten dai ginra hta gasat gala majan byin ai lam gaw n nga tim shada maja hkat masa nga ai re hpe mung chye lu ai. Putao sinpraw hkran ginra hta Dinghkyet , Ding Ga , Marawt , Ma Pyung, Dingsa mare ni nga ai hte ginra masha ni gaw Shau Ga sun ni galaw nna nna aten du yang Putao de htaw dut nna Kan Bau bungli galaw nna nga ma ai raitim hkrun lam pat ai majaw ya aten du hkra gaw sut hpaga lam yawng hkring ra taw ai re hpe mung chye lu ai.

Shiga: Pyilan U