Putao Tanja Mare Makau Kaw Gasat Gala Majan Byin Ai Majaw Ginra Masha Ni Koi Yen Nga Ai Lam

Pajau Media

October 13, 2025

Putao Ginra Lung Sha Yang , Tanja mare makau kaw KIA, PDF pawng hpawm hpung ni hte Myen hpyen dap lapran October 12 ya shana daw hkying 2:00 kaw nna hkying hkum 2 daram na hkra gasat gala majan byin ai majaw ginra masha ni shimlum dum ai shara hkan koi yen nga ai lam chye lu ai.

“ Gasat gala majan masa tup hkrak gaw n chye lu shi ai, gasat gala byin ai shara makau mayan hkan na ni gaw ni nawn ai Putao muklum de koi yen hprawng nga sai, dai maga de ginra masha ni a hkai sun law law galaw da ai re, yawng hprawng yen mat sai” nga nna Tanja mare masha langai tsun ai.

Gasat gala majan byin ai shara gaw Tanja mare makau N Dawng Bum, Tarwa Kawng kaw byin ai rai nna dai shara kaw Myen hpyen dap hte P.T.Ts pawng hpawm ni dap shara jahkrat nga ai shara n nan langai re lam lahta na ginra masha tsun ai.

“ Myen hpyen dap gaw dai shara hpe lai wa sai shata kaw sha shara n nan jahkrat ai re, mare kaw na deng 2 daram sha tsan ai, moi na mare kaw nga ai hpung ni htawt sit mat ai re, KIA pawng hpawm ni mung galoi ma shamu shamawt nga ai re nga yang dai kaw ang katut gasat poi byin ai rai sam ai” nga nna tsun ai.

Gasat gala majan byin ai Tanja mare gaw Putao Myitkyina mawdaw lam ntsa kaw nga ai rai nna lahkawng maga gasat gala majan jahkring hkring byin ai re. Lai wa sai 2023 June shata praw hta mung kalang gasat gala byin ai lam nga ai rai nna ya kalang bai byin ai re lam mung chye lu ai.

Shiga – Mali hku