Ra Lata Poi Daw (1) Ngut Ai Hpang Jinghpaw Mung Kata Sindan Pa Bang Ai Masha Tsa Lam Shadang 68 Nga

Pajau Media

January 15, 2026

Myen Hpyen Dap woi awn galaw ai ra lata poi daw (1) hta Jinghpaw Mung kata ginra (6) hte mare kahtawng, lawk (176) hta galaw lu ai hta Sindan Pa bang ai tsa lam shadang (68) nga ai lam Data For Myanmar tang madun da ai.

Myen mungdan ting madang hku ginra (102) kaw Sindan Pa lu bang Mai AI masha wan (11.6) jan nga ai rai nna, Sindan Pa bang ai ni Wan( 6 ) jan nga ai majaw Sindan Pa bang ai masha gaw tsa lam shadang (52.13 )nga ai lam Myen Hpyen Dap n dau da ai re hpe chye lu ai.

Dai sha n-ga ginra (102 ) kaw na lawk hte mare kahtawng (5,652) kaw na (4,125) kaw sha ra lata poi lu galaw ai re majaw tsa lam shadang (75) sha ra lata poi lu galaw ai lam ndau da ai re.

Daw 1 na ra lata poi mahtai gaw Union Solidarity and Development Party (USDP) hku nna Lawu Rap Daw Dat kasa shara (102) , Lahtaw Rap Daw dat kasa shara (21) shara kaw awng dang ai lam, Lawu Rap Daw gaw Jinghpaw Mung kaw daju ai rudi amyu sha party ni awng dang ai lam n nga ai hpe chye lu ai. Law malawng gaw USDP awng dang ai lam chye lu ai.

Dai sha n-ga ginwang Rap daw dat kasa shara kaw mung USDP gaw shara (108) daram hta awng dang ai lam chye lu ai. Jinghpaw Mung Naung Mung ra lata ginra hta gaw dat kasa langai sha nga ai majaw Sindan Pa bang shingjawng n ra ai re hpe mung chye lu ai.

Ra lata poi Daw 1 hta USDP gaw awng dang ai dat kasa 231 nga taw sai rai nna rudi amyu sha party mung shara n kau hta awng dang lam lu nga ai re hpe mung chye lu ai. Ra lata poi daw 1 hpe Lai wa sai 2025 December 28 ya hta ginra 102 kaw galaw ai re hpe mung chye lu ai.

Shiga – Htu Seng