Ra Lata Poi Daw 2 Hta Ginra Nkau Kaw Shang Gasat Hkrum Ai Majaw Magam Gun Marai 2 Asak Si Sum Ai Lam

Pajau Media

January 13, 2026

Myen Hpyen Dap woi awn galaw ai ra lata poi daw 2 galaw ai aten ginra 10 daram hta htim gasat hkrum ai majaw magam gun marai 2 asak si sum nna hkala hkrum ai mung masha ni mung nga ai lam Myen Hpyen Dap n dau da ai re hpe chye lu ai.

January 11 ya shani galaw ai ra lata poi daw 2 hta Kayin Mung Hpayu Su muklum, Magwi ginra Kant Gaw, Sik Phyu muklum hte Kan Ma muklum, Sagaing ginra Chyaung U Muklum, Bu Talin muklum, Min Mu muklum, Bago ginra Htan Tapin, ginra ni hkan nbungli bawm gasat ai lam, drone bawm, laknak kaji kaba htim gasat ai lam n dau da ai re.

Ya na zawn htim gasat hkrum ai hpang nkau ra lata rung ni hkan sindan pa bang ai lam jahkring kau ra ai re lam tsun ai re.

Ra lata poi galaw nga ai ginra n kau hkan Myen Hpyen Dap kawn tsa lam shadang hpring uphkang ai lam n nga ai re sha n-ga lai wa sai ten gasat gala majan byin ai ginra ni rai nna shimlum lam n nga ai lapran Myen Hpyen Dap kawn ra lata poi galaw nga ai re hpe mung chye lu ai.

Myen Hpyen Dap gaw naw ngam nga ai ra lata poi daw 3 hpe gaw January 25 ya shani matut galaw sa wa na re lam n dau da ai re hpe mung chye lu ai.

Shiga: Hpring