Ra Lata Poi Daw 2 Hta Jinghpaw Mung Kata Na Ginra 3 Mung Lawm Wa Ai Lam

Pajau Media

October 29, 2025

Myen hpyen dap woi awn galaw sa wa na Ra Lata Poi Daw 2 hpe 2026 January 11 kaw galaw sa wa na rai nna Daw 2 hta Jinghpaw Mung kata na Ginra 3 mung lawm wa ai lam chye lu ai.

Ra Lata Poi commission kawn October 28 ya shani n dau da ai hta Ra Lata Poi Daw 2 hta Mogaung, Waimaw hte Machyang Baw Ginra ni lawm ai re hpe mung chye lu ai.

Du wa na December 28 ya shani galaw na Ra Lata Poi Daw 1 hpe Ginra 102 hta galaw sa wa na rai nna Jinghpaw Mung kaw na Ginra 6 lawm ai re.

Daw 1 hpe Jinghpaw Mung Myitkyina, Danai, Hkawng Lang Hpu, Nawng Mung, Putao hte Mohnyin Ginra ni hta galaw sa wa na re hpe chye lu ai.

Myen Hpyen dap woi awn galaw na Ra Lata Poi hpe Daw 3 garan nna galaw sa wa na rai nna Daw 1 hta ginra 102 kaw galaw na re lam, Daw 2 hta gaw Ginra 100 kaw galaw na lam, Daw 3 hpe Ginra 72 hta galaw sa wa na re lam n dau da ai re hpe chye lu ai.

Shiga - Hpring